Seizhah haeuj haemh rumz liengz le, gyoengqvunz cungj gyaez gwn gungqlungziq, daxmeh couh dwg boux ak gwn gungqlungziq. De riengjret mbit gyaeuj gungq ndang gungq, baez caenx rieng gungq, nohgungq “bwdlwd” couh okdaeuj lo, caiq cup amq “gauhenj” ndaw gyaeujgungq, couh feih lumj gwn gaubaeu ityiengh.

“Lijdwg mbouj cup gyaeujgungq lo, ndawde miz haex, gou lau lijmiz ginh- suznaek dem, doiq ndang mbouj ndei!” Gij vah daxboh hawj dou gig dawzhaeujsim. Gou ceuqleuz vix gij gaugungq naeuz:“Gijneix cungj dwg haex deng mbouj deng?” Daxboh maih sawmaeg rim dungx hix naemjnej mbouj dingh.

Dou dawz gyaeujgungq vid youq henz ndeu. Yaep he, sam bat hung gungqlungziq dou gwn liuxseuq lo. Ma daengz ranz, gou sikhaek hwnj gwnz muengx bae caz swhliu. Laxlawz gij gaugungq saek henjgim de dwg gaiq siuvaq duzgungq, mbouj dwg haex gungq. Miz ciennieb gihgou yungh 210 duz gungq- lungz guh genjcwz sizyen, genj ok ndaw ndang gungqlungz caen hamz miz cenh、gwz daengj ginhsuznaek, danhseih gij hamz soq neix cungj lij dwg youq ndaw gvaengh sizbinj ancienz biucinj guekgya gvi- dingh haenx, cijaeu gungq- lungziq dwg daj diuz loh cingqsoq cawx aeu, couh mbouj yungh yousim gijmaz, ndaej cuengqsim gwn ne.

“Yawjdaeuj gyaeujgungq hix ndaej cup.” Daxboh gaij bak naeuz.

“Danhseih mbouj ndaej gwn lai gvaqbouh!”Gou bouj naeuz.

“Cim gij coenz neix, caen ndaej rengz.”Daxmeh daengj mehfwngz hwnj lo.

(Yi Anhyanz / raiz

Veiz Yen’gyangz / hoiz)