Mwh seiq ngux nyied, mak- nengznuengx baenz lo. Ngoenz singh- giz mbwnndit, sim gou hix sangj lo. Daxboh dwen naeuz yaek bae aeu maknengznuengx, vunz lai engq miz yinx, yienghneix dou couh iu gyoengq bohnax、mehnax caezcaemh bae, ngamqngamq naengh rim aen men- bauhceh ndeu.

Dou naengh youq gwnz ci, sohsoh hai bae dieg maknengznuengx, boux- boux aensim cungj mbin daengz geh maknengznuengx lo: Song aen ndoi rim gonengznuengx neix, sieng youq ndaw lueg faex heu, riengz seiqhenz ndoi lueg lienz baenz benq, ranz vunzmbanj sanq youq ndawde, loq raen loq mbouj, youh caem youh liengz, dwg yiengh gyaeundei laj- mbanj gag miz ndwi. Giz deihfueng yienghneix, mboujmiz vunz mbouj simmaez de.

Bouxcawj suen gonengznuengx hawj dou boux aen swx iq, hawj dou gag bae ndaw doengh mbaet aeu maknengznuengx. Gonengznuengx maj ndaej daemq, gij mak de ca mbouj lai daj goekgo venj daengz byaigo, ndwn youq laj goek, iet fwngz couh mbaet ndaej. Gij maknengznuengx lumj lwg- fwngzmeh baenz hung, couhlumj duznonbiz nei, banh rim geh mbaw faexnengznuengx, youq laj mbaw heu, mbaw hung lumj fajfwngz nei, raen venj miz gij nengznuengx yiengh heu oiq、yiengh hoengzaeuj、yiengh yaek hoengzaeuj、yiengh aeujndaem, comz baenz benq, yawj lumj fuk dozveh yiengh guek raeuz aeu raemxmaeg lai saek veh baenz, caen gyaeundei dahraix.

Daihgya daraen le gaenj mbaet gaenj mbaet. Miz boux dawz swx cuengq youq geh nye, ngiengx gyaeuj aeu song fwngz mbaet, fwngz doq dak doq mbaet, baez ngaem gyaeuj couh cuengq gop roengz swx bae, miz boux aeu swx venj youq gengoz, gungjhwet gaem baenz roix, menhmenh niuj, caiq cuengq roengz ndaw swx bae.

Sawqmwh, gou raen gwnz ndoi miz bang lwgsau iq ndeu, gyoengqde daenj gyaep, najaek venj aenbied, song fwngz baez fan mbaw nengz- nuengx, ndaw aenbied couh lai miz song roix maknengznuengx.

Gou dinghdingh yawjraen song faj fwngz gyoengqde lumj duzroeg seizcin nei mbin bae mbin dauq, gij yiengh gyoengqde sawqmwh bienq- baenz lwgsau lengj Loz Fuh ndaw 《Moz Sang Sangh》 Hanyozfuj lo. “Ndit hwnj doengnamz daeuj, ciuq laeuz ranz Cinz gou. Ranz Cinz miz sau gyaeu, gag aeu coh Loz Fuh. Dah ak ciengx nonsei, reih singz namz mbaet sangh……Gvaq loh raen Loz Fuh, cuengq rap rub mumh cim. Mbauqgim raen Loz Fuh, guhyiengh coih gaen duk. Dawzcae lumz bawh vaiz, daengz gvaiz lumz gingz gvak……” Gou gingqyienz mbouj rox, seizneix bonjndang dwg boux gvaq roen, roxnaeuz dwg boux youq ndaw reih guhhong lo.

“Byaij lo!” Daxmeh heuh gou, gou doeksaet singj gvaqdaeuj, nyeux gyaeuj youh yawj gyoengq lwgsau iq caeuq benq reih nengznuengx neix le, cij doq veq gyaeuj yawj doq doeknaiq sisi byaij okdaeuj. Hoeng, youq ndaw reih gonengznuengx faenh simhoz ndei sangj haenx, gij ngeixniemh raen yienghndei ndaw 《Moz Sang Sangh》 haenx, cix lumj duznonsei daz sei nei daz mbouj liux mbouj duenh.

(Liuz Yajvwnz / sij

Veiz Caijcinh / hoiz)