Ngoenzneix gou doigawj《Loqsiengj Manaezvuengz》bonj saw neix hawj daihgya. De dwg bouh sawcuenh bienraez ndeu, dwg boux cozgyah mizmingz Sinj Sizhih sij. Bonj saw neix hix dwg bonj saw ndei gaenq riuz doh daengx seiqgyaiq, bingz ndaej ciengj geq mbouj liux, daegbied hab gyoengq nyezrauh raeuz yawjdoeg.

Bouxcawj ndaw bonj saw neix dwg duz manaez meh heuhguh Swjlanz ndeu, de hungmbwk youh fouzsei. Baez gangj daengz Swjlanz, caen hawj vunz roxnyinh sim’in、cigndaej haenhndei youh gingq- cungh ha!

De hawj vunz roxnyinh sim’in, bouxgvan de Hwzsangh, youq dieg ciengx doihduz vutfwz maj go faexcaz mbwnrengx rumz dongj rox rouxringx rim liux haenx, doek roengz laj dat bae dai lo. De hawj vunz danqheiq, dwg aenvih de ciuhvunz siliengz youh hojlienz. Lumj- baenz de mizndang seiz deng madwkdaeuq gyaepgaj; caiq lumjbaenz seng haj boux lwg, ndawde song boux ngamq doekfag couh deng swyenz caihaih haih dai lo……

De cigndaej raeuz gingq- cungh, youq ndaw ndoengfaex yakyiemj youh yiemzhaenq, de ganq sam boux lwg, yied ngoenz yied majhung bienq ak, hoeng ceng’aeu aen dieg- vih manaezvuengz seiz, vihliux baujhoh gyoengq lwg swhgeij caeuq duzyiuh yak hoenxbuek, doeklaeng caeuq yiuh caez dai.

Cozgyah Sinj Sizhih, dawz duz manaez meh hungmbwk fouzsei ndeu baenzlawz buekmingh ciengx lwg sij ndaej cingcuj caezcup. Aen goj neix lwnh raeuz nyi, diuzroen ciuhvunz raeuz cix mbouj dwg bingzbwd, cungj dwg gumzgumz gamxgamx、miz ndei miz cuij. Raeuz bouxlawz cungj mbouj rox, baihlaeng gyaeundei dwg mbouj dwg dieggungz, hoeng raeuz rox baihlaeng dieggungz itdingh dwg gyaeundei. Gij ginglig Swjlanz lwnh raeuz nyi:“Guh gijmaz saeh, cungj aeu genhciz roengz- bae, danghnaeuz mwngz guh daengz byongh couh vut, haengjdingh guh mbouj baenz saeh; hoeng danghnaeuz mwngz caiq cengqdingj roengzbae, lai roengz- rengz di, saeklaeuq guh ndaej baenz ne!”

《Loqsiengj Manaezvuengz》bonj saw neix, son gou rox haujlai dauhleix, sou hix ndaej cawx daeuj yawjdoeg ha!

(Dungj Swjhau / sij

Vangz Gyanghmyauz / hoiz)