Geij ngoenz gonq, daxmeh youq ndaw ranzsaw laebdaeb cingjleix ok baenz doi baenz doi saw, miz saw gaeuq、bonj raiz cozyez mbouj yungh、bauqceij gaeuq daengj. Dong gyoengqneix youq gungx ndeu, couh lumj goengq bya iq ndeu yienghhaenx sang. Dou gietdingh gai gijneix bae, yienghneix gawq ndaej hawj ndaw ranz caezcingj di, youh ndaej saekdi cienzlingz.

Gou bang daxmeh buen saw daengz bakdou bae, daxmeh heuh goenggeq sou feiqgaeuq haenx daeuj, goengde gwih gyaq cisamloek dienhdoengh ndeu, gwnz naj nyaeuqnyat, noh ndaemndwtndwt, yawj hwnjbae geqyatyat. De roengz ci le, dawz geij diuz cagco okdaeuj, baij aencaengh denswj, yienzhaeuh dawz dong saw haenx faen baenz geij faenh, cunjbei cug. Cijraen de gungj hwet, dawz cag baij youq gwnz namh, dawz doi saw ndeu cuengq youq gwnz cag, caiq gaem song gyaeuj cag, baez rag cag, couh yungh rengz cug, yungh rengz riuj le riuj, youh gveng youq gwnz namh, gizyawz geij dab caemh yienghneix guh.

Goenggeq dawz saw cug ndei cuengq hwnj gwnz aencaengh denswj. Daeb sang le, daxmeh siujsim riri bang cuengq hwnjbae, dong ndei le, gij yiengh dong saw neix lumjbaenz aen laebfueng ndeu. Ndaw bak daxmeh nam naeuz: “Dong saw neix gujgeiq miz bak gaen lo.” Dingq le, gou naemj: Miz baenzneix naek lwi? Yienghneix mbouj dwg gai ndaej haujlai cienz? Gwnz naj gou riunyumnyum. Goenggeq youq gwnz aencaengh denswj anlaeb ndei moix goenggaen gyaqcienz, caengh ndei le, gou baez yawj caengh, gij cih dwg 44.6 maenz, gungh 99 gaen. Gou daengj lwgfwngzmeh coh daxmeh:“Daxmeh, mwngz cai ndaej caen cinj ha!”

Goenggeq dawz 50 maenz ngaenzyienh hawj daxmeh, daxmeh yungh veizsin sauq max doiq 6 maenz hawj goenggeq. Ma ranz le, gou geizheih cam daxmeh: “Vihmaz mbouj dwg bouj 5 maenz 4 gak hawj de ne?” Daxmeh doq riu doq naeuz: “Bouxgeq canh cienz mbouj yungzheih, yienghneix caezgya cungj angq.” Daxmeh dawz 50 maenz ngaenz haenx hawj gou, dang guh hoizbauq gou dwgrengz. Gou siujsim riri dwk dawz 50 maenz gaem youq ndaw fwngz, roxnyinh beij baenz bak baenz cien engqgya dijbauj!

（Gyanghsuh Swngj Suhcouh Gohgicwngz Vaigozyij Fusuz Cinzyiz Siu Yozyau Vangz Gizgyungz raiz / Danz Yaujsuh hoiz）