Moix bungz fwnmoenq doek- foenfoen, gou caeuq daxmeh cungj doxcaez gang aen liengj iq ndeu.

Gou ngeizvaeg cam naeuz:“Daxmeh, aen liengj vihmaz cungj ngeng gvaq baih gou ni?” Daxmeh riu naeuz:“Aenvih rumz bongj fwn mbat, cijmiz gang liengj ngeng di cij mbouj yungzheih ngaiz fwn rweddumz.”

Yienzlaiz dwg yienghneix ha! Gou haenh daxmeh gig coengmingz.

Youh dwg ngoenz fwn ndeu, gou loekloeng yawj raen mbaqgvaz daxmeh ngaiz rweddumz dingzlai lo. Ndawsim gou doeksaet yat, sawqmwh roxyiuj aen liengj vihmaz ngeng——Neix dwg daxmeh “ndiepgyaez” gou. Gvaengzda gou yaepyet dumz lo, raemxda lumj roix caw mae goenq nei, naed dem naed doek doxroengz. Raq rumz ndeu baet gvaqdaeuj, raemxfwn caiq doek daengz mbaq daxmeh, rwed dumz geu buh daxmeh, hix cimq dumz aen sim gou.

Miz ngoenz ndeu cuengqhag, youh doek fwn lo. Gou soemh fwn buet dauq ranz, youq byongh roen mbouj siujsim laemx lo. Geu vaq gou deng gat lo, gyaeujhoq hix ngaiz gvet bae gaiq naeng hung lumj fwngzmeh nei, lwed laeyaeng’yaeng. Gou haeb heuj nyaenx in, lumj duz gaeqboux doek raemx hoenxsaw nei, gvez nduk gvez ndek dauq ranz lo. Daxmeh ganjgip ciep aen daehsaw gou gvaqbae, fuz gou daengz sahfaz naengh roengz- daeuj. De cung haeuj ndaw rug coq doxgaiq bae, ra aen sieng yw daeuj, maeuq youq henz sahfaz doq bang gou siudoeg、bau diegsieng, doq doeknaiq nam：“Danghnaeuz gou bae hagdangz caj mwngz caeux di couh ndei lo, gvaiq gou！” Dingq le daxmeh gangj, gou aeuqnaeuq dangqmaz——Neix mingzmingz dwg gou mbouj siujsim deng sieng, cix loekloeng hawj daxmeh mbouj gvaqeiq.

Bineix ciet daxmeh, gou yungh cienz lingzyungh bae cawx aen liengj ndeu soengq hawj daxmeh. De dwg aen liengj hung cizging ca mbouj lai mij ndeu, hawj mehlwg dou cw rumz dangj fwn ndaej. Gou maqmuengh aen liengj neix buenx gou caeuq daxmeh itheij byaij gvaq ngoenzfwn Sinhcin, aen liengj iq mwh bungz fwn couh ngeng haenx, yaek ciengxlwenx gang youq ndawsim gou, haenx dwg gij haenzcik ndiepgyaez daxmeh.

（Gvangjdungh Swngj Sinhcin Si Hungzlingj Siujyoz Cauzyangz Vwnzyoz Se Cangh Canyenz raiz / Vangz Yigiz hoiz）