Vahsug naeuz “gwn noh mbouj gwn suenq, yingzyangj gemj bae buenq”. Cingqbungz seizcin cietseiz ndei, gou bae ndaem gosuenq! Aen gyaeujsuenq bizbwdbwd deng gou mbek baenz dip dem dip suenq iq, gou haenqrengz cap dip suenq roengz ndaw namh bae, gyaeujsuenq cij loh ok aen gyaeuj iqet.

Gvaq geij ngoenz le, gwnz gyaeuj dip suenq did ok di nyez iq ndeu, hausisi oiqnemnem, soemsetset, caen dwggyaez ha!

Yawj doengh gij nyez oiq neix, gou roxnyinh gyoengqde gig lumj cih Sawgun “蒜”. Bit vang baihgwnz cih Cauj lumj diegnamh, song bit raeh dwg nyez suenq conh okdaeuj, baihlaj song bit vang dinj dwg dip suenq, cih Sawgun “小” ceiq baihlaj dwg rag suenq. Caen lumj gou naemj baenzneix, gyaeujsuenq iq did nyez couhdwg cihsaw “蒜” ma?

Gou cazyawj swhliu, laxlawz, suenq dwg cihsaw yiengh sing doxgap, yawj cihsaw “蒜” Condij, baihgwnz dwg cih gyaeuj Cauj, “祘” youq baihlaj, eiqsei dwg geiqsuenq.

Youh gvaq geij ngoenz, nyez suenq iq maj sang lo, bienq heu lo, rumz ci gvaqdaeuj, lij miz di heiq suenq rangsisi. Daxboh gaem faggeuz bang nyez suenq daet byoemgyaeuj, yaek bang gou cawj vanj mienh iq gya suenq rangfwt ndeu. Daxboh naeuz: “Aeu nyez suenq iq heu daeuj cawj mienh roxnaeuz cauj ngaiz ceiq feih, miuzsuenq majhung le heuhguh gosuenq, ndaej aeu daeuj cauj nohsei, engq ndeigwn! De laebdaeb majhung, yaek maj ok diuz ganj saeqset raezrangh ndeu heuhguh ganj- suenq……” Caengz caj daxboh gangj sat, gou couh angqfwngfwng hemq naeuz: “Gou gwn gvaq ganjsuenq cauj nohgaeq!” Daxboh ciep dwk naeuz: “Danghnaeuz cuengq gyaeujsuenq youq giz laep ungganq, couh bienqbaenz suenqhenj, ndaej youq ndwencieng duk bingjcingienj gwn bw!” Dingq daxboh baenzneix naeuz, gou myaiz cungj yaek rih okdaeuj lo.

Bae, bae hawbyaek! Raeuz caez aeu gij “suenq” ndeigwn haenx cawj baenz byaek feih.

（Gyanghsuh Swngj Nanzgingh Si Lahsaz Lu Siujyoz ngeih (13 ban) Gyaj Cinyi raiz/Vangz Gyanghmyauz hoiz）