Ngoenzneix, daxmeh bae hwnjban lo, gou gag youq ranz sij cozyez. Cozyez ngamq sij daengz buenq, gou sawqmwh siengj hwnj bonj sawgoj ngamq doeg haidaeuz haenx, daengx uk cungj dwg naemj gij cingzcez ciep roengzdaeuj de. Swnh ndaw ranz mbouj miz vunz, gou gaem sawgoj okdaeuj, yinxsubsub dwk doeg hwnjdaeuj. Cingzcez ndaw saw yaep ndeu hawj gou nyaeuq bwnda, yaep ndeu hawj gou riuhaha, mbouj roxnyinh sawgoj gaenq yaek doeg daengz satbyai lo.

“Bingjcwngz, cozyez sij sat caengz?” Aenvih doeg ndaej haeujsim lai, gou lienz daxmeh dauqma hix mbouj roxnyinh. Daxmeh cam le, gou cijndei simhaw dwk singsaeq han: “Cozyez …… lij caengz sij sat……” Naj daxmeh sikhaek yiemzsuk hwnjdaeuj, couh lienz byoemgyaeuj ngaeuzunq de hix lumj roenx gij feih “ywsiu” okdaeuj, de hozgaek naeuz gou, caemhcaiq muedsou sawgoj gou bae.

Begbeg da yawj sawgoj simgyaez deng muedsou, gou nyaenx mbouj ndaej raemxda lae roengzdaeuj. Hoeng, gou rox gij yunghsim daxmeh, yienghneix gou uet raemxda seuq, nyinhcaen sij cozyez. Seiz gou dawz cozyez gyau daengz fwngz daxmeh, de naj riunyumnyum:“Doeg saw rog goq ndaej hawj raeuz yawj ndaej gyae gvangq, rox ndaej lai laeg, hoeng mboujndaej nguh hagsib!” Daj neix gvaqlaeng, moix baez gou siengj caegcaeg yawj sawgoj, gij vah daxmeh cungj youq henz rwz gou yiengjbyoedbyoed.

(Denz Bingjcwngz / raiz Nungz Cinfung / hoiz)