Mozvwn Denhsinh dwg veiyenz Cunghgoz Cozgyah Hezvei, dwg canghraiz ciemiek baez daihsam Sanh- dungh Swngj Cozgyah Hezvei. Okbanj miz 《Fajfwed》《Ringx Daengngoenz》《Gyoengqde Yingjyangj Le Cungguek: Gojgaeq 75 Boux Gohyozgyah Gung- hozgoz (ngeih)》. Haujlai cozbinj fat- biuj gwnz ganhvuz《Lwgnyez Vwnzyoz》《Bouxcoz Vwnzyi》 daengj, deng 《Lwgnyez Vwnzyoz Senjganh》daengj ganhvuz cienj daeng. Cozbinj senj haeuj lai cungj senjbonj、youwzyenz vahsaw gyaucaiz、siujhag gyaufuj doegbonj daengj. Ndaej Byadaisanh Vwnzyoz Ciengj、Binghsinh Lwgnyez Vwnzyoz Faenzcieng Moq Ciengj、Gaiq Daih’it 《Lwgnyez Vwnzyoz》 Ginh Gin Ciengj daengj, ndaej 《Lwgnyez Vwnzyoz》 Cib Boux Canghsei Ak Daengx Guek sam baez, ndaej 《Bouxcoz Vwnzyi》Cozbinj Ndei Ciengj song baez. Lajneix dwg aen gojgaeq de lwnh seiz lwgnyez de.

Seiz iq gou couh dwg boux lwgnyez gig caemdingh ndeu. Ceiq caeux daj geij bi hainduj yawj saw, gaenq geiq mbouj cingcuj lo. Seiz- haenx hix mbouj nyinhrox geijlai cih, gaenbonj cungj dwg youh duenz youh cai, gij cih saedcaih mbouj rox haenx, couh caz sawloih, yienzhaeuh biusij gyoebyaem.

Youq baihlaj gofaexyiz gofaex- cauj gyanghongh, gaemdawz bonjsaw ceij bienq henj, couh yienghneix, gij cih baenz hangz baenz hangz hai aen dou ndaw sim boux lwgnyez haenx.

Laeng gou dwg lajmbanj, mbouj miz gij saw lwgnyez cienmonz ndaej yawj, hoeng haemq caijsoq ndei dwg, aenvih daxboh haengj yawj saw, ndigah ndaw ranz miz saw, gou yawj gij saw haenx couh dwg gij saw daxboh.

Moix baez bae dajcunz, gaem- dawz gij saw bouxwnq couh yungh rengz yawj, gwn haeux hix sij mbouj ndaej cuengq, ma ranz engq dwg doiq gij saw haenx ndiep mbouj sij vut.

Gij ngaenzlingzyungh daxbuz hawj haenx hix dawz daeuj cawx saw.

Gizsaed gou seiz lij iq mbouj rox gou dwg haengj sij faenzcieng, seizhaenx bohmeh cungj nyaengq guh reih guh naz, mbouj haeujsim gou yinx guh gijmaz. Gou ciengzseiz youq gyanghaemh ndoj youq ndaw denz hai soujdendungz laeglemx yawj saw, yienghneix, doeklaeng da mong dangqmaz.

Menhmenh, doeg saw baenz le sibgvenq, yaek ninz gaxgonq engq dwg aeu yawj saw, mbouj yawj saw ninz mbouj ndaek. Doeg saw lumj gwnhaeux haeujninz nei gag aeu guh youh itdingh aeu guh, gaenq baenz bouhfaenh sengmingh gou, dwg doeg saw gaijbienq ciuhvunz gou.

(Lingz Hinghningz hoiz)