Seiziq, gou dwg youq ranz daxbuz majhung.

Geiq ndaej diuz loh boengzhomq iq baihnaj ranz daxbuz haenx dwg dieg guhcaemz seiznyez gou.

Seizhah, non ndaw rum henz loh heuhgitgit, ronghrib lumj aen daengloengz nei ronghyebyeb, gou caeuq duz maraiz iq youq ndaw cazhaz, buet bae saet dauq, loengh ndaej aen ndang nem rim gohaz bae. Ngoenz doekfwn, raemxboengz gwnz loh iq biucancan, gumzraemx feuzfit, gou daenj haizfwn, daiq duz maraiz iq dangh raemx guhcaemz, loengh ndaej daengx ndang uq raemxboengz……Daxbuz mboujdan mbouj ndaq gou, lij cungj dwg riunyumnyum yawj gou. Miz seiz de ing youq gwnz begdou hemq: “Daeg iq mwngz, buet menh di ha……”“Rox lo, rox lo, duzraiz iq, vaiq buet, vaiq buet……” Gou buet ha buet, raemxboengz sinz rim gwnz gavaq, dumz liux bae. Daxbuz riu gou dwg lwgnamhboengz, gou riu duzma raiz iq bienq baenz lwgmaboengz. Maraiz iq angq dwk heuhngaeungaeu hwnjdaeuj.

Doeklaeng, gou ciemhciemh majhung, diuz roenboengz baihnaj ranz daxbuz siusaet bae lo, diuz roen suijniz saeklamz daengh aen mbwn lamzneuneu haenx, gyaeundei dangqmaz. Diuz lohsuijniz neix geiq miz aen loqsiengj doxdax ci gou.

Ndiengq byaidin, caij hwnj gwnzbenj, gaem dawz ci, bibi buengqbuengq aen ci baenq bae baenq dauq.

Gou youq baihnaj gwih, daxbuz youq baihlaeng rex, maraiz iq youq henz buenx.Ya! Nienj deng gaiq rin iq ndeu, ndwn mbouj maenh, gou lienz vunz daiq ci laemx lo. Vaq gwnz gyaeujhoq gou byoengq baenz congh ndeu, in dwk gou bae ndaq ndaek rin haenx. Doeklaeng daxbuz lumj canghguhfap nei, aeu faiq duk gwnz gen caeuq gyaeujhoq gou, baujhoh gen gou caeuq gyaeujhoq gou mbouj hawj deng sieng. Yienghneix seizbienh ndaej youq gwnz lohsuijniz buetsaet bae.

Doeklaeng, gou hung lo, doeg siujyoz, gou buen bae ndawsingz, lohsuijniz bakdou ranz daxbuz hix yaek siusaet lo, dingq daxbuz gangj, benq dieg neix aeu cek bae, yungh daeuj hwnqguh dietloh, laeb hojcehcan, ngoenzlaeng ndaej naengh hojceh baedauq. Gou cam daxbuz dwg caen lwi? “Caen ha, mwngz gvaqlaeng mbouj ndaej youq gwnz diuz roen neix buet lo……” Daxbuz yawj dwk diuzloh iq baihnaj bakdou haenx, gaem fwngz gou ndaetniq bae, lumjnaeuz aeu gaemdawz gijmaz nei. Vah daxbuz hawj gou doeksaet lix, aenvih ranzmbanj fazcanj gig vaiq, gvaqlaeng gou ndaej miznaj dwk caeuq dahcej Sanghaij naeuz, ranz dou hix miz hojcehcan lo!

Gou gaem fwngz daxbuz dauq hwnjbae, ndaw sim maegdoeg: Daxbuz, loh bienq, cingz mbouj bienq ……

Daxbuz gaem dawz fwngz gou, naj riunyumnyum ronghsagsag!

(Yinj Swjciengz / raiz Veiz Yennaz / hoiz)