Laeng gou bau le haujlai daemzbya, gwnz daemzbya ceiq ciengzseiz raen roegcaeuq. Moix baez gou ndij daxboh bae daemzbya cungj ndaej yawjraen gij roegcaeuq ndwn youq henzhamq dwk bya.

Roegcaeuq daj seng daeuj couh gyaeundei, de daengx ndang cungj hau, bwn hau lumj nae. Diuzhoz saeqraez gungj ndei, laenggyaeuj lij miz diuz bwn raezrangrang he, dep laenghoz loq utngeuj, saedcaih lumj dwg dah sausien gyaeundei ndeu. De lij miz doiq ga fonx raez ndeu, youh reux youh soh, ndaej caeuq duzroeg beghagsien beij gyaeu. Aen bak soem de couh dwg gaiq hongdawz dwk bya de.

Ngoenz singhgiz satbyai youqndwi le, gou daeuj daengz baihnaj daemzbya, raen duz roegcaeuq ndeu mbin gvaqdaeuj. Cij raen de bonghmbin gij fwed hausak, ra cinj le gizdieg ceiq ndei dingz youq henzhamq, couh lumj ndaek deusiengq ndeu nei mbouj doengh saekdi, lwgda sohrwdrwd cim coh gwnz daemz, lau loekgvaq saek aen seizndei dwk bya. Cijaeu yawjraen miz bya’iq fouz youq gwnz raemx, de couh vaiq lumj byajraez nei, aeu bak soem de dot bya’iq, caenhguenj duz bya’iq buekmingh siengj deuz, hoeng hix mbouj miz yungh lo, doeklaeng hix baenz gijgwn ndaw bak roegcaeuq lo. Roegcaeuq gaeb ndaej bya’iq le, bonghyat diuq bae, couh daiq gij ndeigwn de mbin deuz lo. De haengjdingh dwg ra gizdieg haemq dingh he, angqyoekyoek dwk gwn imq donq ndeu.

“Raemx gyae mok gvangq, miz duz roegcaeuq mbin aijsa”. Duz roegcaeuq laj bit Ouhyangz Siuh haenx, lumj mbin ok fuk veh, youq gwnz daemzbya bienqbaenz boux dinfwngz riengjret ak dwk bya he.

(Gu Hauyenh / raiz Lij Lungzfangh / hoiz)