Fwn moenq lo.

Ndaw daemzraemx gwnznamh, fwn lij moenq roengzbae. Fwn youq gwnz raemx menhmenh ndik, hainduj dwg aen gien iqet ndeu, caiq mbe’gvangq baenz aen gien hung ndeu. Aen gien baez bienq hung, couh mbouj raen dem lo. Aen gien hung caengz sanq bae, aen gien iq gaenq okdaeuj moq lo, aen gien iq ngamq hainduj bienq hung, aen gien engq iq haenx youh caiq miz okdaeuj lo. Aen gien hung gop aen gien iq, aen gien iq caeuq aen gien hung doxdaeb. Ndaw daemzraemx, gij gien haenx hai baenz aen baenz aen couh lumj dujva nei. Mbouj liux mbouj cod, lumjnaeuz yaek baenzneix aen moq aen gaeuq doxlawh roengzbae.

Dwg ho, sing fwnmoenq miz gij yienghsiengq de, mizmbangj dwg baenz raemxlangh fubfeb luenzlu, mizmbangj dwg baenz aen bop rongh- cingx. Aen bop ronghcingx ndongq- rik haenx bongzbwd, raengnwng, caek fwn doek roengzdaeuj, lumj diuzloih nei ndaek de dek bae. Biba! Aen bop ndeu conh okdaeuj. Youq gwnz najraemx vad bae riengjret, ndoj deuz gij fwn deihyaeng’yaeng daj gwnzmbwn loenq roengzdaeuj haenx, caeuq aen bop wnq doxgap baenz aen ndeu, bienqbaenz aen bop hungloet ndeu. Aen bop hung deng rumz ci bae, yupyup yepyep, ndoj deuz fwn’iq caeuq mbawfaex henj, coh aen seiqgyaiq lwgnyez saenzmaed vad bae.

Roegfek raiz youq ndaw fwn- moenq angqvauvau ciuz “ci——ci——” Gyoengqde mbouj ndoj fwn, couh youq gwnz ngafaex godoengz ndwn dwk, fwn rwed dwk, yiengjsouh aen mbwn gyaeundei maezvunz neix.

Fwn moenq youq gwnz mbawfaex, cij miz di sing loq yiengjsasa, mbouj dingz roengzdaeuj, cix dingq mbouj ndaej nyi bw.

Fwn moenq youq gwnz diegnywj, gij fwn gwnz namhboengz deng sup haeujbae liux, naed fwn gwnz mbaw- faex sikhaek giet baenz caek raemx luenz ronghcingx, caek caek raemx iq cungj dwg naed caencaw hau!

(Siuh Dingli/raiz

Vangz Gyanghmyauz/hoiz)