Daj iq, daxmeh couh itcig gangj gij gojsaeh “Cangzngoz Mbin Ronghndwen” “Houyi Nyingz Daengngoenz” hawj gou nyi.Baez daengz seizneix, gou couh gag guh gij loqsiengj ndeindi’ndi haenx: Gwnz rongh- ndwen caen miz duzdouq lwi? Naqgung caen ndaej nyingz daengz daengngoenz lwi? Danghnaeuz caen dwg yienghneix, gou caen siengj bae gwnzmbwn yawj baez he.

Hoeng ngoenzneix, gou sienqdi cix rox, gijneix caen mboujdwg saenzvah cienznaeuz lo. Gwnzmbwn, gaenq iet fwngz couh daemx. Dangyienz, diuz loh hwnj mbwn mbouj dwg heihfedfed couh ndaej caij okdaeuj, cixdwg Cunghvaz Minzcuz raeuz baenz ciuh baenz ciuh vunz, baez yamq baez yamq vunqdin byaij okdaeuj.

1949 nienz, Cunghvaz Yinzminz Gung- hozgoz laebbaenz, aen lizsij Cunghvaz Minzcuz mbehai mbawceij moqsagsag lo. Cunghgoz hangzdenh saehnieb yienh’ok hoenghfwdfwd.

Youq 1970 nienz 4 nyied 24 hauh, Dunghfanghhungz It Hauh Veisingh fazse ndaej baenz, aen guek raeuz haiok le aen nienzdaih moqsagsag. Sawj Cungguek baenz aen guekgya gwnz seiqgyaiq daihhaj aen ndaej fazse veisingh ndeu.

Samcib bi laeng, seizgan dinghyouq 2003 nienz 10 nyied 25 hauh banhaet 9 diemj. Youq Ciujsenz Veisingh Fazse Cunghsinh, riengz dwk sing hung gok rwz yaek nuk ndeu, guek raeuz gag yenzgiu guhbaenz aen “Sinzcouh Haj Hauh” ruzmbin haenx deng soengq daengz gwnzmbwn bae.

Cien bi gaxgonq, “Cangzngoz Mbin Mbwn” lij swnghhoz youq ndaw gojgaeq, seizneix Cangzngoz gaenq cingqcaen coh ronghndwen mbin bae lo. 2007 nienz 10 nyied 24 hauh, guek raeuz fazse ndaej baenz daih’it aen veisingh damqrau ronghndwen“Cangzngoz It Hauh”, baenz gwnz seiqgyaiq daihseiq aen guekgya roxyungh veisingh damqrau ronghndwen gisuz. 2019 nienz 1 nyied 3 hauh, “Cangzngoz Seiq Hauh” aendamqrau saedyienh le vunzloih baez daih’it youq raeblaeng ronghndwen unq roengz deih. Youq baihlaeng ronghndwen louz roengz le dozsiengq cingqsik ndeu.

Baenzlai bi daeuj, mbouj noix hangz- denhyenz youq gwnzmbwn louzroengz le gij vunqdin gyoengqde, youq gwnz lizsij louzroengz le gij mingzcoh gyoengqde. Dangyienz miz haujlai gohyozgyah lauheiq gehgumhgumh mbouj miz vunz rox. Mbouj- gvaq, youq gwnz ndang gyoengqde myigmyanz gij hangzdenh cingsaenz haenx, dauq cigndaej dou ciengxlwenx geiqmaenh. Gij saenqniemh dinghmaenh ndiepgyaez guekcoj、 vih guek ceng aeunaj gyoengqde, gij yisiz roengzrengz baenaj、gamj bae hamjgvaq gyoengqde, gij gunghcoz cozfungh gohyoz gouzsaed、yiemzsuk nyinhcaen gyoengqde, gij aekgvangq doengzruz gvaq- dah、doxgiet habrengz gyoengqde, gij binj- caet sangndei yawjcit mingzleih、caenhrox okrengz gyoengqde, gamjdoengh dwk baenz daih baenz daih bouxcoz nyezrauh dou. Cograwz gou hix siengj baenz boux hangzdenhyenz ndeu, saedyienh gij loqsiengj hwnjmbwn gou.

Cienzswnj hangzdenh cingsaenz, ceng- guh nyezcauq mizyungh. Baez daengz mwh gou muenghyawj gwnzmbwn, gou cungj youq ndawsim gag lwnh bonjfaenh nyi, yaek vih le gij loqsiengj hwnj mbwn gou bae roengz- rengz hagsib.

（Luz Meijcinz / raiz

Yinj Fuzgen / hoiz）