Gaujgenj suyoz fat roengz- daeuj lo, gou gawqyienz gauj ndaej bak faen ndeu, caen dwg siengj mbouj daengz ha, “hawj daxmeh angq mbat ndeu ba!” Gou nu fwngz siengj.

Dauq daengz ranz, daxmeh cingq saeg buhvaq. Gou menh- menh byaij gvaqbae, gangjmbo- mbo naeuz:“Daxmeh, gou …… gou miz aen siusik ndei ndeu caeuq aen…… siusik rwix ndeu, mwngz siengj nyi aen lawz gonq?” Daxmeh mbat anj ndeu, siengj le siengj doiq gou naeuz:“Nyi siusik rwix gonq ba!” Gou amqamq angq youq ndaw sim, geiqvag baenz lo! “Gou baezneix suyoz gauj mbouj ndei.”Gou “damjmbup” nam naeuz.“Geijlai faen?” Naj daxmeh yawj mbouj raen biujcingz, hoeng ndaw da yienh ok simnyap.

“Mbouj daengz loegcib faen.”Gou ngaem gyaeuj, cibcuk “haeuj heiq”.

Daxmeh cuengq buhvaq ndaw fwngz, daengx gou naeuz:“Heuh mwngz saeqsim caiq saeqsim, hoeng cungj dwg raegrwz! Mwngz niemhsuenq le lwi? Mwngz genjcaz le lwi?” Daxmeh hozndat raixcaix, bwn’gyaeuj ca di daengj hwnj- daeuj lo, “aeu gaujgenj okdaeuj hawj gou yawjyawj!”

Gou saedcaih nyaenx mbouj ndaej, riu doiq daxmeh naeuz:“Mwngz gaej hozndat, gou lij miz siusik ndei ne!”

“Lij miz gijmaz siusik ndei? Gangjriu ba!” Daxmeh najlaep lumj gaeuq.

“Siusik ndei dwg, gou hax- baenh dwg caeuq mwngz gangjriu, gou suyoz gauj ndaej bak faen ndeu!” Gou angq lai diuq ndaej sam cik sang.

Gou daj daehsaw aeu gauj- genj okdaeuj ndenq hawj daxmeh, de menhmenh bek aen gyaeuj gou naeuz:“Dah fangzbyaiz neix, cawj- eiq rwix caen lai!” Gou diuqbeiz riuriu, yaek bae rug. Daxmeh sawqmwh daih hemq sing ndeu:“Ndwn haenx!” Gou simdiuq aek- diuq. Daxmeh riu youh lumj mbouj riu, menhmenh dep gyawj gou naeuz:“Mwngz mbouj rox yaeuh vunz dwg loek lwi? Mwngz mbouj roxnyinh yaek vih gij loek ndang- gaeuq ciepsouh ceihfad lwi?” Gou simvueng eiqluenh, mbouj rox guh gijmaz, aj bak han:“Lij miz siusik ndei lwi?”Daxmeh ngaekngaek gyaeuj, vix buhvaq ndaw buenz naeuz:“Mwngz gojyij saeg buh.”

Daxmeh uetuet fwngz, cienq ndang haeuj ranzsaeuq bae lo, ce gou bak ajloengloeng youq haenx.

(Anhveih Swngj Anhging Si Yinzminzlu Siujyoz Cangh Yaj- senh raiz / Lij Yanghlenz hoiz)