Ndwensam, daengz seizcin lo. Raemxfwn nyinh roengz namh bae, doenghgo gwnz namh dauq fat dauq did.

Mbwn ngamq hainduj rongh, caengz hwnj rumz. Gou byaij haeuj ndawhag, ndawhag dauqcawq lij caemrwgrwg. “Cici cetcet”, geij sing roeg eu daj gizgyae cienz daeuj, banromh hainduj nauhyied hwnj- daeuj. Mbwn yied daeuj yied rongh, baez di baez di menhmenh bienq o. Ndit daj gwnz mbwn cik roengzdaeuj, daengx hag ronghsagsag.

Ndwn youq laj ndit, gou yawjraen fwn gvaq le gwnz byaifaex de did moq lo, gofaex dauq lix gvaqdaeuj. Cienq gyaeuj yawj lingh giz, doengh gofaex gorum de yawj hwnjdaeuj lumj fuk doz ndeu, va hai gig hoengh, lumj mbaw baengzva ndeu, gijneix cungj dwg gij saenqhauh seizcin daengz lo.

Rumz ci gvaq naj, gou mup daengz gij heiq seizcin. Gou caeuq rumzcin youz ndaw hagdangz. Youq henz cauhcangz haenx, va mwn rim nga, gyaeundei raixcaix. Vayingh hai hoengh youq gwnz nyefaex, lumj dah lwgsau gwnz ndang daenj diuz vunjsa saekmaeq, youq gizde diuq foux, gig ndeiyawj. Baihhenz govayingh dwg goleiz, gij valeiz haenx baenz nyoemq baenz nyoemq hausaksak, lumj duj fwjhau gwnzmbwn. Vadinghyangh caemh hai hoengh dangqmaz, lumj diuz dah saekgyaemq, ndei- yawj raixcaix…… Mboujlwnh dujva maz, cungj youq fawhcin neix haihoengh haivuengh.

Byaij gvaq cauh- cangz le, couh yawj- raen baenzbaiz faex- coengz heuswd、faex- laeux heuoiq、go’gyoij sanghung, faexcaz daemqdet, aen laeuzsonsaw dou couh daengj youq baihlaeng benq raemh neix, yienznaeuz gwnz roen hagdangz vunz mbouj lai, hoeng laj govayingh、henz caz dinghyangh、ndaw laeuz- sonsaw haenx cungj cienz daeuj sing doegsaw. Sijsaeq dingq, mizmbangj doeg sei, mizmbangj doeg sanjvwnz, mizmbangj doeg danhswz Yingh- yij……Daj gij sing doegsaw neix, gou dingq daengz le gyoengq doengzhag muengh lai rox cihsiz, dingq daengz le gyoengq doengzhag roengzrengz baenaj, engq dingq daengz le gij maqmuengh seizcin.

Raeuz dwg dujva guekcoj, raeuz youq laj ndit raeujrub neix angqyangz hungmaj, daengzcog mbouj geijlai nanz dem couh aeu rap hwnj diuz rapnaek hwnqguh guekcoj. Raeuz yaek doiq ndaej hwnj guekcoj raeuz, naihhaemz doegsaw, roengzrengz buekguh, ceng guh hauxseng ndei seizdaih moq.

Seizcin dauqma, fanh yiengh did moq. Seizcin ndawhag dou dwg dujva hai hoengh rangfwtfwt, gofaex heu- swdswd, lwgnyez gwnznaj riuhaha, sing doegsaw hungsek gapbaenz.

Seizcin ndaw hagdangz ndei raixcaix!

(Sanhdungh Swngj Linzyiz Si Gijyangz Siujyoz Gauh Yizcwz raiz/ Veiz Munglingz hoiz)