Daxbuz gou youq lajmbanj, baihlaeng ranz de miz diuz dah iq ndeu, ndwn youq henzdah couh yawj ndaej raen gij gingjsaek gyaeundei haenx, gij gingjsaek gyaeundei neix youq ndaw singz caen mbouj raen gvaq.

Raemxdah sawdikdik, yawj ndaej raen daejdah, mizseiz lij ndaej yawjraen geij duz bya iq mongmyigmyig haenx riengjret youz gvaqbae. Dingq Daxbuz naeuz, gaxgonq de couh youq ndaw dah mok haeux swiq byaek. Hoeng seizneix miz swlaizsuij le, gizneix couh bienqbaenz gizguh’angq hanqhau hung caeuq bithau iq lo.

Bithau hung dazyinx bithau iq, yaep he youq ndaw raemx doxgyaep guh’angq, yaep he ndonj haeuj ndaw go’em bae guh yahndoj, yaep he ndaem roengz raemx bae coemj byalwg gwn. Gij yienghceij “bwnhau fouz raemxloeg” haenx, caen caeuq ndaw sei sij ndaej doxlumj lili. Seizhah, gou haengjheiq aeu gep vax he youq ndaw dah iq dwk biuraemx, gep vax youq gwnz mienh raemxdah saetyatyat, mienhraemx roenxok luzraemx baenz gvaengz baenz gvaengz. Dwk biuraemx naet le, daxboh couh daiq gou bae mo lwgsae caeuq duzgungq, gou sim’angq raixcaix.

Doiqhamq dah miz doengh naz ndeu. Seizcin, ndaw naz ndaem miz gij va’byaek henjrwgrwg haenx, va homfwdfwd, yinx hawj duzrwi gaenxguh haenx daeuj mbaet va aeu dangz, gou fwngz humzgodgod, nyaenx mbouj ndaej aeu soujgih ingj gij yiengh gyaeundei de roengzdaeuj.

Caj daengz gvejsou cehbyaek le, ndaw naz couh caiq ndaem haeuxnaz. Seizcou baez daengz, gij haeux henjrwngrwng haenx couh riu dwk hwet goz bae. Rumzcou baez ci, haeuxfag baiq hwnj baiq roengz, couh lumj raemxlangh ityiengh diuq foux rubrub, angqhoh fungsou.

Ndwn youq henz dah iq, baez ngiengx gyaeuj couh yawjraen go faexsamoeg cangqcwtcwt ndeu, ganjfaex beij diuz hwet gou lij cangq. Seizhah youq gizneix yietliengz ceiq hab’eiq lo, gofaex couh dwg aen liengjhung heuswdswd ndeu. Henz faex- samoeg lij ndaem miz go makndae ndeu, baez daengz seizcou, lwgndae youh hung youh van, gwn gaemzgaemz cungj lumj gwn gojdung nei, nohmak yaepyet couh gyod roengz ndaw dungx bae. Lwgndae mboujdan baenz gwn, lij gyaeundei raixcaix, lumj baenz aen baenz aen daengloengz iqet nei hoij youq gwnz nyefaex, hawj vunz haenh bak mbouj dingz.

Diuz dah iq lajmbanj neix lauheiq mboujmiz geijlai vunz dawz de haeujsim, hoeng youq ndaw lwgda gou, gizneix caen gyaeundei dangqmaz ha!

(Gyanghsuh Swngj Cangzsuz Si Sizyen Siujyoz Luj Yinzhih raiz / Yinj Fuzgen hoiz)