Ranz gou miz duz nouceij（仓鼠） dwggyaez ndeu, ndang biz- boedboed lumj aen giuz nei, gij bwn hausaksak de cab miz geij diuz raiz ndaem’aeuj. Gwnz gyaeuj iq de miz doiq da iq lumj baujsig ndaem nei, lij miz doiq rwz gig iq ndeu, yawj hwnjbae gig miz eiqsei. Gou an de guh “Giuz”.

Giuz bingzseiz gig maeuzgwn. Cijaeu gou ma daengz henz de, aen da iq mwnzlulu de couh cim gou mbouj cuengq, miz mwh lij heuh gij sing“gid gid”okdaeuj, lumj- baenz naeuz:“Gou iek lo, gou yaek gwn doxgaiq!”Gou dingj mbouj ndaej gij yiengh youh dwggyaez youh doekcaw de, couh gueng gaem haeux ndeu hawj de. De raen miz gij ndeigwn lo, sikhaek couh dangq gou dwg ngaeuz byouq, fwt coemj bae coh gij doxgaiq lajda de,ngaem gyaeuj gwn doxgaiq lo.

Gij yiengh Giuz gwn doxgaiq engqgya dwggyaez. Cij raen de aeu song lid iq ganaj gaem dawz haeuxgok, baez di baez di, menhmenh dawz haeuj bak bae. Seiz de nyaij gwn, song gemj de lij rox bongz okdaeuj. Giuz aenvih mboujmiz banhfap baujciz bingz- yaenx, cijndaej lumj duzfw ityiengh seiq ga daengj mbwn daengjhai dwk, caen hawj gou daej riu mbouj ndaej. Engq mizyinx dwg, Giuz gwn doxgaiq seiz lij rox cigciep dawz gyaeuj moek roengz ndaw haeuxgwn bae amq hung- hung gwn dwk, miz seiz engqgya rox boemz daengx ndang roengz gwnz haeuxgwn bae, gwn imq dungx bongz le cij cukcak aen ndang mwnzlub de ndonj okdaeuj.

Giuz hawj gou angqheiq gig lai, gou maij duz nouceij iq youh dwggyaez youh diuqbeiz neix.

( Cin Yungzswnh / raiz

Veiz Yen’gyangz / hoiz)