Dingq gij go yienghneix liux, couhdwg rindalij, hix rox bienq ndaej unqswnh.

Dingq gij go yienghneix liux, vunzlai couh mbouj caiq roxnyinh lau caeuq gadog. Daihgya aeundaej baujcingq le, lumjnaeuz ndaej ciengxlwenx baetduet boihseiz.

Duj va nonhgyaemq iq, dahsau mbouj miz mingzcoh, vihliux angqcoux seizcin, mwngz hix wnggai ciengq diuz go ndeu hawj bonjfaenh.

Dingq gij singhap haenx, fukcab cix youh angqyangz, mwngz mbouj caiq dwg boux dog, cix dwg haujlai haujlai.

Haenx dwg duj va nonhgyaemq iq ndeu, yienghhaenx unqswnh rox laex, yienghhaenx unqnyieg. Gou mbouj rox mingzcoh de.

Hoeng gou rox: De dauqdaej rox hailangh, dan aeu didi raemx, didi doem.

Gou goj rox de rox bauqdap. Youq mwh hailangh, de rox cuengq gij hom de okdaeuj mbouj daengx.

Youq laj ndit, de lij rox ingj ok aen ngaeuz iqet ndeu, saek lumj gij ngaeuz byaifaex faex hung nei.

Aen ngaeuz de yienznaeuz dwg aen liengj iqetet ndeu, cix bang duz moed hojlienz ndeu dangj ndaej ndit.

De vihliux lwnhgangj, hix rox fat ok di sing yaeng’yaeng ndeu, couh lumj gij sing duz mbajhenj mbin yeg- yeg, lumjnaeuz mbouj miz saekdi sing.

Hoeng, duj va iq mbouj miz mingzcoh dauqdaej miz gij go bonjfaenh, gij yinhyoz bonjfaenh.

（Yenz Vwnzcingj / raiz

Cwz Fanghdingz / hoiz）