Geij bi neix, cejbiuj gou yied daeuj yied geizheih. De yienzlaiz yiengh lumj lwgsai nei, daenj buh buhgendonh、vaq niuzcaij、haiz lienhndang, raed byoem dinj daengz rwz, bingz lumj mienhdiuz venj saux nei, gij yiengh neix caen ha de dangqmaz. Hoeng de cix fwt ce byoem guh raezraez bae.

Cam de vihmaz fwt ce byoem raez, de cix riungoemngoem.

Byoem cejbiuj maj ndaej caen vaiq, ndaemndwt youh ngaeuzyub, lumj foh maesei ndaem nei, cuengq roengz gwnz mbaq daeuj sohswdswd, fwngz lumh raen unqmienz lumj baengzcouz nei. Aenvih cejbiuj byoem raez, baez veqlaeng riu, yiengh byoem raez neix boiq fouq da ndongqliklik de, faj naj mboengmbupmbup gyaeu- ndei lumj dujva seizcin. Aiya, cejbiuj ce byoem raez, daengzdaej ce hawj bouxlawz ne?

Miz ngoenz ndeu, cejbiuj sou ndaej gienh soengqvaiq ndeu, baez hai le, de sim’angq baenz mbaj caemz va, saetsaet diuqdiuq, lij doiq gienh soengqvaiq aeu fwngz beij guh geuz yaek raed dem, angq lumj doq fwed yaek mbin nei. Swnh de mbouj louzsim, gou fwt dued mbawceij ndaw fwngz de gvaqdaeuj, yienzlaiz dwg mbawdan habgek gien byoem.

Cejbiuj vih gijmaz gien byoem ne? Gienh saeh neix aeu daj 2020 nienz gangj hwnj. Mwhde, ranz cejbiuj miz vunz youq yihyen yw bingh, de bae yihyen buenxhoh, youq ndaw binghfuengz, de raen gienh saeh coegsaej ndeu: Miz dahniq gyaeujndoq ndeu, yawj dwg roek caet bi baenz hung, aeu saibaengzgeuj cug baenz yiengh duzmbaj le, gingz hwnj gwnz gyaeuj bae ciuq gingq.

Daxmeh dahniq neix raemxda doekbyoegbyoeg bae gotumj de.

Menhmenh sug le, cejbiuj cij rox dahniq neix yienzlaiz dwg boux baenz bingh’aizcwng, aenvih guh valiuz byoem loenq liux lo. Lwgmbwk bouxboux maij gyaeundei, mboujguenj de iq geijlai.

Dahniq gyaeujndoq neix caemh doxdoengz. De caen muengh gyaeuj miz byoem raez gyaeundei. Daj yihyen dauqma le, gienh saeh dahniq aeu saibaengzgeuj cug baenz yiengh duz- mbaj gingz youq gwnz gyaeuj, cungj ngoenzngoenz youq ndawhoz cejbiuj, de roengzsim bang dahniq guhdaengz miz byoem raez, hawj dahniq lengj lumj yienghgaeuq, vihneix cejbiuj roengzsim haeuj doih caeuqfaenh gien byoem.

Hoeng, gij byoem gien hawj boux bingh’aizcwng, iugouz yiemz dangqma: Byoem aeu ndaem aeu ngaeuz, mbouj ndaej nyumxyw, mbouj ndaej cughot. Yienghneix, cejbiuj hixnaengz ce byoemfoh raez. Daj 2020 nienz daengz 2023 nienz, cejbiuj caengz raed byoem saek baez gvaq, lij vih hawj gij byoem de unq youh ngaeuz, byai byoem mbouj baenz nga, mbouj geuj mbouj nyungq, ca mbouj geijlai aeu song ngoenz couh bae swiq gyaeuj hoh byoem baez ndeu. De doiq gou naeuz:“Mwh roxnyinh haemzmbwq, gou couh naemj daengz aeu hawj gyoengq dahsau iq daenj byoemgyaj neix sim- angq le, seizseiz roxnyinh miz sim miz rengz guh roengzbae.”

Ngoenzde, cejbiuj caen guh- daengz hab gien byoem, de heuh gou buenx de bae aen diemq raed byoem haenx, raed ndaej dug byoem 40 lai lizmij raez okdaeuj. Seiz yaek raed, canghraedbyoem cam cejbiuj baez youh baez, naeuz byoem baenzneix raez baenzneix gyaeundei, raed bae sim’in mbouj. Cejbiuj fwngz gvaz dak byoem raez hwnjdaeuj, fwngz swix menhmenh lumh, naeuz:“Gou caen maij gij byoem raez gou, hoeng, miz boux dahniq ndeu cingq deq yungh byoem raez gou……”

Yawj cejbiuj, ndawhoz gou siengj: Doekfag daengz ndawbiengz, aenvih bungzdaengz yiengh nanh neix yiengh nanh de, mizmbangj vunz saedceij mbouj raen saek ngoenz ndei, Hoeng, aenvih miz cejbiuj yiengh simndei neix, gwnz mbwn gyoengqde ndaundeiq cungj rongh lo.

Riengz gij rongh cejbiuj gou, gou hix nyienh bienqbaenz boux simndei ndeu, aj fwed bae henhoh gij raeujrub ndawbiengz……

(Nanzningz Cibseiq Cunghyoz Langdungh Yaugih 2021 Gaep Liengz Hungzdingz raiz / Veiz Caij- cinh hoiz)