Neix bya sang dah gvangq,

Roen goz dangq saejyiengz,

Vunzdig gyaep laeng riengz,

Mieng yaek mied hungzginh.

Gvaq Cizsuij seiq baez,

Cuenq bae youh cuenq dauq,

Mauz Cwzdungh lingjdauj,

Laux Ciengj gyaep mbouj dawz.

Daengz Gveiyangz mbouj haeuj,

Cix yaeuh hoenx Gunhmingz,

“Dieg mbouj sam cik bingz”,

Cing ndaeng vunzdig cuenq.

Mbouj roengzmok cix fwn,

“Mbwn ndi sam ngoenz gvengq”,

Doh gvaq Ginhsahgyangh,

Laux Ciengj dadaengx ndwi.

4. Guh “Yizhaij Gietmaengz”

Ndaemq haeuj Daliengzsanh,

Byaij diegmbanj Yizcuz,

Neix aen biengz nungznuz,

Daemjdu gej mbouj ndaej.

Raen hungzginh daeuj daengz,

Dawz nangx laengz dangqnaj

Hat mbouj cinj byaij gvaq,

Swenj gaj vunz faeg vunz.

Liuz Bwzcwngz okdaeuj,

Caeuq Yezdanh doxyaeng,

Guh “Yizhaij Gietmaengz”(Yizhaij

Gezmungz),

Gapguh baenz beixnuengx.

Ndaej beixnuengx daiq roen,

Soengyungz gvaq Liengzsanh,

Ndaej vaq yiemj vaq nanh,

Ndaej dingz langh dingz rumz.

Gauj minzcuz doxgiet,

Dieg neix guh ndaej ndei,

Daj mbat neix doxbae,

Gaklengq daeuj ei yiengh.

5. Ak Dangq Gyoengq Saenzsien

Ranghdieg Daduhoz,

Ngozngoz bya sangsum,

Raemxdah laehumhum,

Lumj cienfanh max guengz.

Hungzginh daengz gizneix,

Seiqmienh deng fung roen,

Gizgiz cungj mbouj doeng,

Mokhoenz roemj dangqnaj.

Moeb roengz Anhsuncangz,

Youh vang gvaq dahyiemj,

Cibcaet boux bingciengq,

Hoenx ciemq gvaq dah bae.

Hungz seiq donz vaiqriengj,

Buet ciengj Luzdinggyauz,

Baetcawz gyoengq fangziu,

Byaij diuzgiuz gvaq dah.

Dwk hoenx giz youh giz,

Ciengj Gaisiz gikheiq,

“Siz Dazgaih bouxngeih”,

Mbouj ngeix duet deuz bae.

Byafangz Gyazginhsanh,

Fanh seiq ndi vunz daengz,

Hungzginh dangq bingsaenz,

Byanae laengz mbouj ndaej.

Daengz Maugungh doxcomz,

Song bang caez doxgap,

Miz saeh ndaej caemh rap,

Doxgap engq miz rengz.

Dawh cug guh baenz bog,

Beij cikdog genq lai,

Caih rengz cwz rengz vaiz,

Euj dai euj mbouj raek.

Cangh Gozdauh yaemmaeuz,

Aeu cungq cijveih dangj,

Yienghyiengh gag cujcangh,

Deng Cunghyangh baebingz.

（17）