Sai:

Sam nyied sam daeuj daengz,

Raeuz doxnyangz doiqfwen,

Nuengx sing fwen gokrwenz,

Haemhlwenz guh loq nyi.

Mbwk:

Beix gag gangj gag naeuz,

Raeuz mbouj baenzneix ndei,

Gangj doiqfwen yungzheih,

Nuengx ceiq fug mwngz lai.

Sai:

Nuengx lumj duj vadauz,

Naj hoengzmaeq hau oiq,

Guh fwen beix nanz doiq,

Lumj moegloih fouz sing.

Mbwk:

Nuengx lumj duj vavengj,

Lengj mbouj beij va wnq,

Caemh doih daeuj hawfwen,

Haexmax wenj youq rog.

Sai:

Nuengx dwg duj vagim,

Vunz daeuj cim daeuj coh,

Beix lumj gaeq fwed yoq,

Mbouj gamj coh naj vunz.

Mbwk:

Dingq beix gij vah neix,

Gag ngeix gag siengj riu,

Beix ndangcangq sohsiu,

Sau daeuj ciuq daeuj coh.

Sai:

Ngoenzneix ndaej doxbungz,

Ciuhvunz geiq mbouj caenh,

Song raeuz miz yienzfaenh,

Caenh cingz niemh roengzbae.

Mbwk:

Caeuq beix doxbiek bae,

Ngaezngwd laj goge,

Beix naihsim bae deq,

Daengz bande caiq daeuj.