Sam nyied riengz rumz daengz,

Haeuxnaengj homfeifei,

Cosam dwg ngoenzndei,

Seicingz sij hawj nuengx.

Sam nyied cosam raeuj,

Doxcaeuq bae hawfwen,

Siengj nuengx ndwen dem ndwen,

Bae hawfwen guhcaemz.

Gaem fwngz nuengx gvaq loh,

Bae Hawmoz fwen doiq,

Mbawfaex did heuoiq,

Boiq seizcin daeuj daengz.

Dou daeuj daengz Hawmoz,

Sing go cienz okdaeuj,

Vunz youz byaij raen gyaeuj,

Boux haeuj youh boux ok.

Gou daj ndaw daehcoeng,

Soengq hawj nuengx aen goenh,

Nuengx angq raemxda loenq,

Lumj fwnmoenq daeuj daengz.

Nuengx soengq hawj aendomq,

Fwngz gomq sim yied diemz,

Dawz haeuj rungj bae diem,

Niemh dahnuengx cingzngeih.

Hawfwen caen nauhyied,

Vunz yied daeuj yied lai,

Bouxmbwk caeuq bouxsai,

Sim hai va gyau youx.

Fwen doiq daengz mbwn laep,

Cingz naek youq ndawsim,

Ngoenzneix biek nuengxgim,

Dauqbae ninz mbouj ndaek.