Ndaw hagdangz seizcin lumj benq haijva ronghsag nei, valanz saekaeuj、vadauz saekhoengzmaeq、labmoiz saekhenj hai ndaej cingq hoengh, gou cix gag gyaez vayilanz hau cinghseuq gyaeundei haenx.

Gyae’gyae muenghyawj, vayi- lanz hau caenx rim nyefaex, go yilanz lumj longz geu buhsa hausag ndeu nei. Rumzsaeq ci gvaq, vayilanz hau saenqdoengh ndangdaej, lumj duz- roegbeggap hau iet fwed, diuq foux yebyeb. Duzrwi nyouq daengz heiqhom cix daeuj hix nyaengq dwk youq ndaw va ndonj bae ndonj dauq, hawj vayilanz haumbapmbap dem le geij faen lingzdoengh.

Daengz gyawj baez yawj, moix duj vayilanz hau cungj gag miz daegsaek. Mizmbangj cienzbouh hai hoengh, lumj dahsau sangreux gyaeundei; mizmbangj limqva ngamq hai song sam limq, lumj dahsau iq najnyaenq cingq yaeng’yaeng muengh seiqgyaiq; mizmbangj dwg lupva, bongz lumj yaek dek nei. Dangh- naeuz dawz gij dangqnaj yawjraen neix beijguh fuk veh ndeu, dinfwngz canghdajveh saedcaih ak gvaq vunz.

Yawj fuk dozveh gyaeundei dangqnaj, gou lumjdwg hix baenz duj vayilanz hau ndeu lo.

Gamjsouh gij ndit raeujrub, caeuq baenz duj baenz duj va gwnz nye itheij riengz rumz diuq foux. Rumz gvaq le, gou hix dingz roengz- daeuj dinghdingh ndwn dwk. Duz rwi ndeu mbin daengz henz ndang gou, lumjdwg lwnh gou dangzrwi de aeu haenx geijlai van……

Singhgiz haj mwh cuengqhag, vayilanz hau rim faex cingq hai hoengh, hoeng singhgiz it daeuj daengz hagdangz baez yawj, vayilanz hau gwnz go cungj loenq liux lo. Yawj ngafaex ndoqndatndat, gou nanzgvaq dangqmaz. Seizneix, gou myaegraen di heumoq ndeu——O, yilanz hau maj mbaw lo! Gij mbaw oiqwdwd haenx, iqetet, dwggyaez raixcaix. Dingzlai doenghgo cungjdwg maj mbaw gonq hai va laeng, hoeng yilanz dwg hai va gonq maj mbaw laeng. Neix dwg vih gijmaz ne? Gou cungj naemj mbouj doeng.

Gou cam gohyoz lauxsae, gohyoz lauxsae riu dwk han naeuz:“Gij va caeuq gij mbaw doenghgo bingz- ciengz dwg youq seizcou bigonq couh maj baenz lo, cijdwg deng suek youq ndaw ngaz. Daengz seizcin le, mbwn bienq raeuj, gyoengqde couh maj okdaeuj lo.” Lauxsae daengx yaep ndeu, laebdaeb gangj:“Yilanz hau cix mbouj doengz, mbwn haemq nit de hix did ndaej lupva, baez haeuj seizcin mbwn yienznaeuz lij nit, hoeng gij raeuj haenx gaenq muenx- cuk de fatmaj.”Hoeng mbaw nyod de majhung aeu mbwn engq raeuj, ngamq haeuj seizcin mbwn lij nit mbouj miz banhfap hawj de majhung, vihneix gij mbaw de ciuqgaeuq “gaenzgaeq” dwk. Caj daengz mbwn raeuj, nyodngaz couh maj okdaeuj lo.

Vayilanz hau iqetet cangcoux gij gyaeundei caeuq saenzgeiz geq mbouj liux. Danghnaeuz mwngz hix lumj gou nei maij vayilanz hau, mwh seizcin va hai, mboujfuengz daeuj hagdangz dou caeuq gou guhdoih yawj vayilanz hau gyaeundei ba!

(Lij Yizcinz raiz/Nungz Cin- fung hoiz)