Boux hawj gou ceiq hoj lumz haenx, dwg boux lauxsae mehmbwk mwh gou doeg siujhag haenx, coh de heuhguh Cai Yinzcih.

Dauqngeix hwnjdaeuj, bande Cai Yinzcih lauxsae aiq miz cib betgouj bi. Combak baihgvaz de miz naed reindaem hung lumj naed ngaenzdih ndeu nei. Gou ndaejgeiq bouxvunz de hozraez youh gyaeundei.

De coengzlaiz mbouj ndaq dou moeb dou gvaq. Dandan miz baez ndeu, geu bien sonsaw de lumj yaek fad roengzdaeuj nei, gou aeu rinbanj ma dangj, geu bien cix mbaeumbaeu fad youq gwnz rinbanj haenx, gyoengq doengzhag raen le riuhaha, de caemh riu lo. Ceh da lwgnyez iq gvai dangqmaz, bande gou cix rox lo, de gyaez gyoengqdou, mbouj miz saek di sim naeuz yaek moeb dou.

Bingzseiz roengzdangz le, de son dou diuq foux, gou lij ndaej- geiq raixcaix, de hawj gou cang guh lwgmbwk diuq foux gienh saeh neix.

Youq ngoenzgyaj seiz, de daiq dou bae ranz de caeuq laeng baengzyoux de. Youq ndaw suen baengzyoux de, de hawj dou bae cazyawj duzrwi, caemh dwg youq bande, gou roxnaj le duz rwivuengz, caemhcaiq ciuhvunz baez daih’it ndaej gwn dangzrwi.

De gyaez sei, caiqlij haengj aeu gij diuh eu fwen daeuj son dou doeg sei. Daengz banneix lo gou lij ndaejgeiq gij diuh de doeg sei, lij ndaej boih okdaeuj：

Mbwn goeb youq gwnz haij,

Raemx laeg daiq ruz gyauh bae,

Gyae dwk yawj mbouj raen bya,

Dinmbwn danmiz fwj,

Hix yawj mbouj raen faex,

Gwnz raemx haenx cijmiz roeghaijouh……

Banneix ngvanh daeuj, de doiq gou nebdawz caeuq gyaezmaij vwnzyoz miz haujlai yingjyangj mizik! Lumj cungj lauxsae neix, dou baenzlawz mbouj haengj de, baenzlawz mbouj nyienh caen’gyawj de ne? Dou mbat- mbat raen de le cungj doq conx bae homz de. De sijsaw seiz, dou cungj dinghdingh yawj de sij, daengz gij yiengh gaem bit de cungj aeu hag liux bae.

(Vei Veih raiz/Veiz Munglingz hoiz)