Doengxhaemh, rumz liengz- sisi. Fwjndaem gyuemluemz doh mbwn, goemq ndaej gwnz dieg laepyubyub, hoeng geh fwjndaem daengh ok benq ronghgim ndeu lwenqbyangbyang, cek fwjndaem baenz gofaex baenz dujva, gyaeundei dahraix. Ronghndwen loq raen loq mbouj raen, lumj baengzsei goemq gwnz namh nei, daengh sejrongh ok geh fwjndaem daeuj.

Youq doiqnaj, giz caz rum, raen geh rum miz gijmaz rongh- rikrik. Byaij bae gyawj yawjyawj, geh rum douh miz aen ndaundeiq ndeu. Laxlawz, ronghndwen dax- meh yaek gaujniemh aen ndau- ndeiq neix, soengq de daeuj gwnz namh.

Aen ndaundeiq neix ngamq daengz gwnz namh, yawj gijmaz cungj raen ndeiyawj, de yawj- yawj yienghneix, youh lumhlumh yienghhaenx. Ndaundeiq bungz- daengz gyoengq moed nyaengq ndeu, de cam:“Vei, moed iq! Sou nyaengq gijmaz ne?” Duzmoed iq naeuz:“Ndaundeiq ha! Dou cingq beuj gijgwn, hoeng byaij roen loeng fueng lo, mbouj rox baenzlawz guh lo!”

Ndaundeiq gag haibak naeuz:“Gou rox fat rongh, gou bang sou ra roen ma ranz!”

“Gyo’mbaiq mwngz lo!” Duzmoed doenghsim naeuz.

Soengq duzmoed iq daengz ranz le, ndaundeiq dauqma ndaw caz rum, ndaw hoz naemj: Ronghndwen daxmeh gaujniemh gou yiengh maz ne? Seizneix, ndaundeiq fwt dingqnyi duzdaek daeggo heuh. Laxlawz dwg duz- daek daegnuengx manz lai, guh- caemz daengz gyanghwnz cungj mbouj rox dauq ranz, daeggo cingq ra de ne!

Ndaundeiq gag haibak naeuz:“Gou rox fat rongh, gou ndaej bang mwngz ra raen daegnuengx.”

Doeklaeng ra raen duzdaek daegnuengx la! De aiq dwg guh- caemz baeg lo, youq ndaw caz rum ninzndaek bae. Ndaundeiq soengq beixnuengx duzdaek daengz ranz liux.

Ndaundeiq miz di baeg lo, naeuz ra giz yietnaiq yaep ndeu.

Seizneix, song gaiq ga de byaij mbouj maenh, fouz youq gwnz namh, mbin daengz gyang mbwn, bienqbaenz gwnzmbwn aen ndaundeiq ceiq rongh ceiq rongh de.

Ronghndwen daxmeh doiq de naeuz:“Lwg ha, mwngz haengj bang vunz couh dwg gienh saeh gaujniemh ceiq hung, gou vih mwngz roxnyinh miznaj.”

Ndaundeiq dingq le, riu- nyumnyum.

(Cwngh Sih’wz raiz / Veiz Caijcinh hoiz)