Ngeih sam nyied haigyaeuj,

Mbwn raeuj fwncin roengz,

Biendah valeux hoengz,

Doenghnaz gogo oiq.

Sam nyied daengz Mbanjcuengh,

Gizgiz miz muengh lai,

Ndawhaw dap godaiz,

Gwnzndoi vamai angq.

Naengj henj aeu vafonq(vamai),

Naengj fonx aeu mbawraeu,

Bouxcuengh dinfwngz mbaeu,

Guh haeuxnaengj hajsaek.

Daj ciuhlaux roengzdaeuj,

Mbanjcuengh raeuz fwen lai,

Bouxmbwk caeuq bouxsai,

Hai bak sing fwen langh.

Sam nyied fwnraemx raeuj,

Gohaeux maj lumj rumz,

Raeuz Bouxcuengh simyungz,

Gaemfwngz eu fwen moq.

Najfwngz hix dwg naeng,

Laengfwngz hix dwg noh,

Raeuz caemh vunz Cunghgoz,

Lumj caemh boh doengz seng.

Baihnaj hix dwg baengz,

Baihlaeng hix dwg faiq,

Raeuz gak cuz doxmaij,

Lumj faiq laenz baenz mae.

Gwn raemx gaej lumz mboq,

Duet hoj gaej lumz ngeih,

Saedceij gvaq ndaej ndei,

Baengh meiz(miz) Gungcanjdangj.