Soengq biek bi duzdouq,

Coux daeuj bi duzlungz,

Ranzranz nem doiq hoengz,

Vuenyungz gvaq ciengmoq.

Rumzcin yaeng’yaeng daeuj,

Mbwn raeuj bak va hai,

Ndaej rwed fwn rwed raiz,

Faex dai dauq did nyod.

Gwnzmbwn baez hai byaj,

Lajbiengz haeuj hongnaz,

Gyoengq vunzsai vunzbaz,

Ndawnaz nyaengqfoedfoed.

Haeuxnaengj sam nyied sam,

Heiq hom ranggietgiet,

Lai minzcuz doxgiet,

Caemh daeuj hoh ciet ndei.

Sam nyied sam baiqgoeng,

Niemh cojcoeng aendaek,

Baeuqroxdoh cingz naek,

Raeuz gaejlaeg lumz bae.

Sam nyied sam hawfwen,

Sing rwenz doh seiqlengq,

Nyi sai mbwk doiqciengq,

Bouxsien siengj daeuj ngonz.

Sing fwen hwnj youh roengz,

Vunzlai doengzcaez angq,

Coenzcoenz dwg haenh dangj,

Ganq hawj raeuz raen ndei.

Sam nyied ngoenz Mbanjcuengh,

Beixnuengx caux doxhuz,

Dieg raeuz lai minzcuz,

Caemh ruz vaij baenaj.