Cin daengz daihdeih ndiu,

Byaheu goengq rangh goengq,

Vunz guhhong ndawdoengh,

Sing fwen hoengh baenzmaz.

Vareux hai hoengzouj,

Roegenq douh gwnzbam,

Yaek daengz ciet ndwensam,

Mehranz muengzfoedfoed.

Gwnz bya euj mbawraeu,

Henz rij aeu mbaw’gyaemq,

Vihliux guh haeuxnaengj,

Ngoenz hong nyaengq mbouj dingz.

Haeuxnaengj baenz haj saek,

Daek daeuj coq gyangranz,

Bouxlaux angqyangzyangz,

Lwglan riusiegsieg.

Daxlungz ranz baihgwnz,

Geq lwgfwngz deqmuengh,

Caeuxcaeux senq doxduenq,

Beixnuengx comz baiqgoeng.

Mehsimj ranz baihlaj,

Naeksim caj bouxgvan,

Caj dauqma sauqsan,

Lan ndei mbouj lumz coj.

Dah naj maeq naj hau,

Cang baenzsau fouzbeij,

Angq lumj duz roeglaej,

Yaek faengz naeq hawfwen.

Gyoengq daegcoz lwgmbauq,

Ciuz doih lauh okbae,

Dangq duzroeg hozraez,

Yaek bae ra gapyoux.

Doengh lwgnyez doegsaw,

Cawzneix ceiq haengjheiq,

Haeuxnaengj soengq gagaeq,

Gwn ndaej feih lailai.

“Sam nyied sam” ngoenzciet,

Cuengqgyaj gvaq ciet ndei,

Gak minzcuz Guengjsae,

Ndaej caezcaez angqlag.