Ngoenzhaenx gvaqringz cuengqhag le, gou ngamq yaek dauq ranz, mbwn sawqmwh laep roengzdaeuj. Mbouj ndei, yaek doekfwn lo, gou ganjgaenj byaij yamq laux.

Fwn naeuz doek couh doek, “dida!” naed fwn lumj naed duh haenx doek youq gwnz naj gou. Riengzlaeng, naed fwn engq deih engq hung daj gwnzmbwn gig vaiq “dub” roengzdaeuj. Mbouj miz banhfap, gou cijndei ndwn daengz laj yiemhranz bouqgaicawx ndeu ndoj fwn.

Ndwn youq bakdou gaenq yingjyangj daengz vunz guh gaicawx, yienzbonj gou yaek haeujbae cawx bingz raemx ndeu guh di “eiqsei”, doeklaeng lumh daengx ndang, faen cienz ndeu hix ra mbouj raen. Bingzseiz gou mbouj daiq soujgih youq ndang, gwqneix hojguh lo.

Fwn yied doek yied hung, rwed maq- muengh ndaw sim gou ndaep. Mwh gou yawj gij fwnhung haenx ngaezngwdngwd, “gvangdang” sing ndeu, dou bouq hai lo. Yah buzgeq ndeu ok dou daeuj, de fwngz ndeu dawz faexdwngx saenzfaenfaen, fwngz ndeu lij gaem doxgaiq. De yienh doxgaiq ndaw fwngz de gvaqdaeuj——dwg aen liengj ndeu! Yahbuz bakunq doiq gou naeuz: “Lwgsau iq, gou yawj mwngz youq gizneix ndwn gig nanz lo, mwngz yawj fwn gwq ndeu daengx mbouj ndaej. Gou ciq mwngz aen liengj ndeu, mwngz ganjgaenj ma ranz ba!” Gou mbouj gamj saenq, daj ndaw fwngz yahbuz ciep gvaq aenliengj, lienzlienz mbaiq yahbuz. Hoeng yahbuz cij dwg baet gen riunyumnyum, hawj gou ganjgaenj dauq ranz……

Youq gwnz roen dauq ranz, gou itcig siengj: Yahbuz roxnaj gou ma? De vihmaz ciq liengj hawj gou boux najmoq neix ne?

Fwn doek le geij ngoenz, daengzlaeng mbwn gvengq lo. Ngoenz singhgiz, gou ganjgaenj dawz aen liengj haenx bae daengz aen bouq, ra yahbuz boiz liengj. De cingq naengh youq bakdou laepda yietnaiq, gou mbouj siengj heuh de singj, couh siujsim dawz aenliengj ing youq henz dou- gaexrag. Seizneix, gou myaegraen gwnz dou raiz le geij cih saw——Guh saehndei ceiq angq.

Gou sikhaek fwt singj gvaqdaeuj, yienzlaiz, yahbuz ciq liengj hawj gou gaenbonj mbouj dwg loeklak——De itcig saedhengz “guh saehndei ceiq angq”!

(Du Swjmwz/raiz Lij Yanghlenz/hoiz)