Seiz lwgnyez couh lumj fuk dozveh nei, veh rim gij saeh lai saek lai yiengh; seiz lwgnyez couh lumj caz va nei, duj beij duj gyaeundei; seiz lwgnyez couh lumj bonj saw nei, geiq gij saeh “ngawz” seiz iq lwgnyez.

Mwh gou ndaej seiq bi, bihaenx seizdoeng doek naefaiq hung, gou raen rog ranz naefaiq mbinyagyag, couh buet bae gyanghongh aeu fwngz coux nae, nae doek daengz ndaw fwngz couh cieg lo. Yienghneix, gou aeu baujvwnhbeih bae coux, nae hix baez doek daengz ndaw baujvwnhbeih couh mbouj raen lo.

Naefaiq youq ndaw fwngz ndaw bauj- vwnhbeih cungj dawz mbouj maenh, gou hoz yaek dek, cix naengh youq gwnz diegnae daej lo.

Baengzyoux ndei gou Siujhanz dingqnyi gou daej le buet gvaqdaeuj, dep rwz gou gangjsebseb:“Gij saeh neix guh mbouj heih ha? Gou rox guh!”

Gou dingq le mbouj daej lo, ngiengx gyaeuj ngeizvaeg yawj Siujhanz.

Lwgda de cienqvaegvaeg, riuhaha naeuz:“Mwngz yawj, mwh seizcin gyoengq nungzminz bohlungz doek faenhaeux roengz ndaw reih bae, gvaqlaeng couh hwnj haujlai gomiuz, baenzneix raeuz seizneix ndaem naefaiq, daengz seizcin bi moq, mbouj couh did haujlai naefaiq ha?”

Gij vah Siujhanz hawj gou fwt uk doeng hoz rox, caen najmboeng simhai lo.

Gou caeuq Siujhanz doxcaez bae daengz suenbyaek laeng ranz, dawz fag gvak iq, hag yiengh daxbuz hai fog byaek. Siujhanz gop naefaiq cuengq roengz ndaw fog bae le youh moek hwnjdaeuj.

Baez siengj daengz bi moq ndaw reih yaek maj naefaiq hwnjdaeuj, rim reih ndongqliklik, lij ndaej youq dangqnaj gyoengq doengzdoih iq angj mbat ndeu, gou couh yied guh yied miz rengz……

Gou muengh ha muengh, seizcin daengz lo, vadauz、vamakleiz、vadiebcin cungj hai lo, gofaex iq hix did ngaz moq lo.

Gou ngoenzngoenz bae suenbyaek yawj gij naefaiq gou did mbouj did ngaz, hoeng gou muengh da yaek doek, cix mbouj raen gij naefaiq ndaem youq ndaw suenbyaek neix did saek ngaz.

Miz ngoenz ndeu, gou caen naihhoz mbouj ndaej gienh saeh neix lo, buet ma ranz cam daxmeh:“Seizcin daengz lo, vihmaz gij naefaiq gou ndaem haenx lij caengz did ngaz ne?”

Daxmeh song fwngz gop naj gou, riu ndaej mbaetgaed bae, menhmenh doiq gou naeuz:“Lwgnyez huk gou ha, aenvih naefaiq mbouj dwg gij ceh doenghgo, ndigah mbouj rox fat ngaz ha!”

Bi dam bi gvaqbae lo, moix bi baez raen naefaiq, gou lij gag ngeix daengz gij saeh “ngawz” seiz lwgnyez, gag riu bonjfaenh dwg “lwgngawz”.

(Ouhyangz Mwzginj/raiz Veiz Caijcinh/hoiz)