Duz manaez ndeu doek roengz ndaw hongx bae lo, baenzlawz diuq hix diuq mbouj hwnjdaeuj. Doeklaeng, duz mbej geq ndeu byaijnwdnwd gvaqdaeuj, duz manaez guhmuengz dongx duz mbej geq: “Beixnuengx! Vihliux cingzngeih beixnuengx, daeuj bangbang gou vei!”

Duz mbej geq cam: “Mwngz dwg bouxlawz? Vihmaz saet roengz aen hongx canghdwkdaeuq cang bae?”

Duz manaez doq cang ok yiengh youh laux- saed youh cojgvaq, naeuz: “Gou, mwngz mbouj rox ha? Duz ma youh cungcig youh sienhsoh ndeu, vihliux gouq duz gaeq iq doek hongx ndeu, gou maz cungj mbouj goq, mbouj lau vutmingh, sikhaek diuq roengzdaeuj, couh hwnjbae mbouj ndaej lo. Ai! Hojlienz hojlienz gou duz ma geq sienhsoh neix ba!”

Duz mbej geq yawj de geij baez, miz di mbouj saenq, naeuz: “Mwngz caen dwg ma ha? Vihmaz mwngz yawj hwnjbae baenzneix lumj manaez, vihmaz mwngz yawj gou fouq lwgda mwngz yak lumj manaez nei?”

Duz manaez guhmuengz buenq laep da naeuz: “Gou dwg ma’ngauz, ndigah miz di lumj manaez. Hoeng, cingj mwngz saenq, gou cingqcaen dwg duzma. Gou hozraez dangqmaz, gou lij rox bi rieng dem. Mbouj saenq mwngz yawj, diuz rieng gou bi ndaej geijlai ndei.”

Duz manaez vihliux cwngqmingz vah bonj- faenh, couh beng diuz rieng geng de bi geij mbat. “Bubu, bu!” Ndaw hongx miz geij ndaek doem cungj deng de saenq roengzbae lo.

Duz mbej geq vuengmuengz doenqlaeng yamq ndeu, naeuz: “Dwg lo, mwngz rox bi rieng. Hoeng duz rox bi rieng mbouj itdingh cungj dwg ma. Mwngz naeuz, mwngz caen dwg duz ma’ngauz ma?”

Duz manaez miz di naih mbouj ndaej lo: “Mboujloek, mboujloek! Gou mieng gou dwg. Vaiq di, vaiq di vei! Vihliux cingzngeih beixnuengx, dan aeu mwngz iet faj ga ndeu roengzdaeuj, gou sikhaek hwnjbae ndaej lo. Gou okbae ndaej couh sikhaek bauqdap mwngz. Beijlumj, gou ndaej bang mwngz rizriz bwn、bang mwngz haebhaeb duz- naenz. Caen bw, gou maij mbej raixcaix, daegbied dwg mbej geq.”

Duz mbej geq lij dwg miz di ngeizlaengx, youh doenqlaeng yamq ndeu: “Mbouj ndaej, gou aeu naemjnaemj gonq.”

Seizneix, duz manaez caen naih mbouj ndaej lo, sawqmwh fatheiq. De mbe aen bak ok, loh ok gij heuj soemsadsad de, doiq duz mbej geq rongx naeuz: “Mwngz duz geqgak neix! Mbouj vaiq di gvaqdaeuj, mwngz siengj guh gijmaz?!”

Duz mbej geq caemdingh yawj de da ndeu, menhmenh dap naeuz: “Maz cungj mbouj guh. Aenvih mwngz dwg manaez. Gou yawjraen gaiq heuj soem mwngz lo. Bi’gvaq seiznit mwngz haeb gou gaemz ndeu, ceng di couh haeb dai gou. Gou daengxciuh hix lumz mbouj ndaej. Mwngz couhcinj rox bi rieng hix yaeuh mbouj ndaej gou, gou bae lo, baezlaeng mbouj doxraen lo!”

(Yenz Vwnzcingj/raiz Cwz Fanghdingz/hoiz)