Youh dwg singhgiz roek aen lajbyonghngoenz ndeu, gou hai conghcueng, sup gij heiq singjsien, ngiengx gyaeuj muengh raen gwnz- mbwn miz bang roeg ndeu mbin cwxcaih raixcaix, gou couh dwen- dauq gienh saeh siengsim seizgonq haenx.

Bi’gvaq seizhah, daxboh daj diegrog dawz duz roeg ndeu ma ranz, duz de baenzndang cungj dwg saek henj lumj gim, lumj duenh nei, song lwgda lumj rinbauj yienghhaenx ndaemndongq, aen bak youh iq youh soem de dwg saek henj lumj makdoengj, song diuz nyauj youh iq youh hausaksak haenx gig dwggyaez. Gou an aen coh heuhguh “Siujmeij” hawj de.

Hainduj, “Siujmeij” aiq mbouj hab’wngq youq ndaw loengz ciengx, gou baezbaez bae gueng de, de couh “caca” swenjngaungau, swenj hwnj- daeuj cungj mbouj rox dingz, lumjnaeuz de “gangyi” deng gyaeng youq ndaw loengz, gou couh dwk gijgwn hawj de le, caiq ciengq go diuq foux hawj de yawj, lij guh coujnaj daeuq de, caemhcaiq gangj gak cungj saeh mizyinx hawj de dingq. Gvaq geij ngoenz le, aiq dwg gou yienghneix guh gamjdoengh de lo, aiq dwg de hozhep lo, gou bae gueng de seizhaenx, de mbouj caiq swenjngaungau “gangyi” lo. Geij ngoenz roengzdaeuj, dou baenz baengzyoux ndei lo. Ngoenznaengz gyanghaet, “Siujmeij” cungj aeu gij sing seksak de heuh gou ndiu, gou ngoenznaengz hix ciuqseiz bae gueng de.

Miz ngoenz ndeu, gou youqndwi mbouj miz maz guh, couh dawz mbaw bauqceij daeuj yawj, gou raen gwnz bauqceij miz geij cih saw hung wenjda: Baujhoh duzroeg, bouxboux miz cwzyin. Aen sim gou lumj deng bien fad mbat ndeu nei. Gou laeglemx ok yangzdaiz bae, yawjraen “Siujmeij” youq ndaw loengz muengh gwnz mbwn, gij yiengh de youh ngaez youh siliengz. Daengz banringz le, gou dawz gijgwn dwk daengz dangqnaj “Siujmeij”, daej- saekwk doiq de naeuz:“Gwn ha, gwn ha, gwn donq neix le, donq laeng aeu gag ra gwn la……” De gwn imq le, gou gaeb de ok loengz daeuj, hai conghcueng le, naeuz “bae ha”, de coh gou ngaekngaek gyaeuj, “gigi”heuh song sing, mbin bae lo. Bae la bae la, rim cib ndwen la! Dou haethaemh doxyouq cukcuk cib ndwen ha, “Siujmeij” mbouj nyeux gyaeuj yawj gou couh bae lo. Gou roxsingj gvaqdaeuj, raemxda gaenq lae baenz benq lo.

Gou caensim hohfuk “Siujmeij” vuenyungz angqyangz.

（Meijvwnz/raiz Yinj Fuzgen/hoiz）