Gij goj boux hungmbwk Liuz Huzlanz, seiziq couh dingq daxboh daxmeh gangj gvaq. Liuz Huzlanz aen coh yiengjsadsad neix caeux couh geiq youq ndaw sim gou maenhswd, gou maqmuengh caeux di ndaej doeg bonj saw gvendaengz Liuz Huzlanz.

Ngoenzneix gou dauqdaej caij- soiq ndei doeg daengz bonj saw neix, gij saeh maenh’ak Liuz Huzlanz ndaw saw sij haenx hawj gou gamjdoengh dangqmaz, aensim saenqdoengh gig haenq.

Liuz Huzlanz, dahniq ngamq ndaej 15 bi, hoeng de cix doiq gij saehnieb aen dangj gig cungsim, doiq yinzminz、doiq doengh boux gwzming dungzci wnq ndiepgyaez naeklaeg, youq dangqnaj vunzdig saeknaj mbouj bienq, mbouj lau dai saekdi, doeklaeng vut diuzmingh oiq swhgeij, vih gij saehnieb aen dangj caeuq yinzminz caenhsim caenhrengz, buek- mingh daengz dai.

Gou ceiq gamjdoengh dwg: Liuz Huzlanz yaek deng gaj gaxgonq song ngveih lwgda de ndongq- gywggywg, caemhcaiq daengx dwk luenzlulu. Lumjnaeuz doiq vunzlai naeuz: De yaek caenda yawjraen vunzdig deng mied, yawjraen aen doih swhgeij hoenx hingz dauqma. Neix dwg gij saeh geijlai maenh’ak geijlai cigndaej haenhdanq ha.

15 bi, dwg duenh nienzgeij ceiq gyaeundei. 15 bi, raeuz lij youq henz- ndang bohmeh yiengjsouh ndwen- ngoenz vuenyungz! Mbouj you mbouj heiq doegsaw、gwndaenj! Hoeng, Liuz Huzlanz cix deng vunzdig gaj dai, diuzmingh lixgyoeggyoeg ndeu couh baenzneix liux lo. Mauz Cwzdungh boux lingjsiu hungmbwk raeuz, youq mwh geiqniemh Liuz Huzlanz sij naeuz: “Lix seiz hungmbwk, dai le miznaj.” Gawq vah ndeu gyoeb gangj ok gij saeh maenh’ak Liuz Luzlanz.

Yienznaeuz Liuz Huzlanz dai lo, hoeng gij yienghsiengq ronghlwenq gyaez guekgya gyaez lwgminz de, gij cingsaenz mbouj fug mbouj lau de, seizseiz riuzcienz bouxboux haenh- danq, itcig gikcoi daih dem daih vunz vih lwgminz fouqmiz、guekgya hwngvuengh, vih guhbaenz gung- canj cujyi daihdamj buekguh!

Doeg bonj saw neix liux, gou rox aen dauhleix ndeu: Gou sengmaj youq aen nienzdaih hozbingz, mbouj miz doxdawz, mbouj miz hoenxciengq, gij vanzging yienghneix dwg ciencien fanhfanh bouxmaenh’ak guh gwzming lumj dahcej Liuz Huzlanz aeu lwed- hanh、aeu diuzmingh vuenh daeuj. Mwhneix raeuz engq aeu insik gij ndwenngoenz ndaej daeuj mbouj yungzheih neix! Vihliux engq ndei bae vih vunzlai guh saeh, gou gietsim daj seiziq couh ndeindei doegsaw, hagrox gohyoz vwnzva cihsiz caeuq sevei cihsiz, lienh baenz bonjsaeh ak, laebhwnj gij yawjfap cingqdeng bae yawj saeh dingh saeh, mboujduenh muzlienh gij ceiqheiq swhgeij, yiemzgek iugouz swhgeij, caenndang bae guh, hawj swhgeij coh aen muzbyauh cingqdeng ndeu yamq bae. Vih hwnqguh sevei cujyi yendaiva gien ok goengrengz caeuq dungxcaiz.

(faenzcieng ndei gwnz muengx Vangz Gyanghmyauz/hoiz)