Seizdoeng haet ndeu, gou baez beng hai baengzcueng, couh yawjraen baihrog haumyanmyan liux. Hwnzlwenz doeknae, gofaex、 dingjranz、 gwnzhaw cungj longz geu buh hausagsag. Ndit baez ciuq, nae lwenqmyabmyab, daengx aen seiqgyaiq cungj bienq ndaej seuq- cengh youh gyaeundei.

Gou angq dwk cing daxboh daeuj siujgih gvangjcangz yawj nae. Sawqmwh, dingqnyi sing angqhemq:“Ndei gwn lai lo!”Gou baez yawj, raen geij daeg nyez iq gwn nae. Gou gig geizheih, hix siengj cimzcimz gij feih nae. Daxboh mbouj hawj gou gwn:“Gaej yawj nae baenzneix hau, gizsaed de mbouj seuq ne, hamzmiz haujlai nengzbingh, mbouj ndaej gwn……”“Gou mbouj saenq!” Gou naeuz hawj daxboh, ngauzgyaeuj laglag. Daxboh naemj- naemj le, naeuz:“Yienghneix raeuz guh aen sawqniemh ndeu.”

Naeuz guh couh guh! Ma daengz ranz, dou ra aen doengj suliu seuq ndeu、aen vanj seuq ndeu、fag geb seuq ndeu bae geb nae. Gou bae geb gij nae gwnz daizva caengz miz vunz deng gvaq haenx, daegbied seuq. Ma daengz ranz le, gou dawz doengj nae cuengq henz feiz, hawj de yungz vaiq di. Caj nae cungj yungz baenz raemx le, daxboh couh heuh gou dawz raemx ndingq roengz ndaw vanj seuq bae. Caj geij faen cung hawj raemx caem le, gou yawjraen daej vanj miz doxgaiq caem.

Yawj daengz gij doxgaiq caemdaej neix, gou rox, mbouj naengz cimz nae lo. Gou miz di doeknaiq. Daxboh naeuz：“Nae dwg daeuqmingz, hoeng baihndaw de cix gig fukcab, gij saek rongh cienzbouh youq ndaw nae ciuq bae sinz dauq, gij rongh lai cungj saek haenx doxdaeb doxgap, couh hawj dou yawj gij nae lumj gig seuq nei. Hoeng, nae youq gwnzmbwn doek roengzdaeuj seiz, deng nem gij uq caeuq nengzbingh ndaw hoengheiq, ndigah nae mbouj naengz cigciep gwn. Mboujcix, gou cawx gaiq sietdiuz ndeu hawj mwngz gwn ba.”Yienznaeuz mbouj ndaej cimz nae, hoeng ndaej gwn sietdiuz hix mbouj loek, gou angq dwk diuq hwnj sam cik sang.

Gwnzbiengz cien yiengh fanh yiengh, raeuz mbouj ndaej doq yawj doq saenq liux. Gou naemj, “gaej yawj najraemx bingz lumj gingq, aeu yawj lajraemx laeg- luemluem” couh dwg naeuz aen dauhleix neix ba!

(Mung Swjgiz)