Singhgiz roek, daxmeh soengq gou bae laeng daxgoeng guhcaemz, youq ranz daxgoeng gou yawjraen duzmoed iq caeuq duznon doxbuek, ciengz doxbuek neix cingqsaed le doxgiet goengrengz hung.

Miz doih moed ndeu gamz gij gwn, baenzbaiz baenzbaiz byaij ma rongz. Gyoengqde lumj lienhndang gvaq nei, buen doxgaiq gwn ciennieb dangqmaz, daengx doih baenzbaiz baenzbaiz yiengq “aen ndoeng” baihnaj haenx giz “ndoi iq” de byaij bae, gou ngvanh, aen ndoi de aiq dwg ranz gyoengqde ba. Youq gwnz roen gyoengqde ma ranz haenx, gyoengq moed deng duz non hung ndeu laengz roen, duznon neix aen ndang hung gvaq duzmoed haenx baenz cib boix, gou liengh gyoengq moed yaek cuengq gij doxgaiq roengzdaeuj le fugsaw lo, ndaw sim lij caegcaeg gouz goengmangh baujyouh gyoengq moed ndaej daj yiemj bienq an, mbouj miz maz saeh. Siengj mbouj daengz gyoengq moed iqet neix fanj cuengq gij gwn de roengzdaeuj caeuq duznon hungloet haenx doxbuek, duznon haenx yawj gyoengq moed lumj yawj deb byaek feih ndeu, caj gyoengqde gag soengq noh daengz bak daeuj. Duznon menhmenh raih bae depgaenh gyoengq moed iq haenx, byawz rox gyoengq moed mbouj deuz cixbah, cix doxcaeuq raih bae hoenx duznon haenx, aeu heuj haeb duznon. Bande duznon haenx cij rox gyoengq moed neix yaek hoenx de, de siengj deuz, hoeng gaenq nguh lo, gyoengq moed iq cungj haep de hwnjdaeuj liux.

Bang moed iq neix ak dangqmaz, gaenlaeng le ram duznon haenx ma ranz, miz haujlai moed iq ok rongz daeuj ciep, gyoengqde aeu song diuz mumh de doxlwnh haujlai nanz, naeuz dwg baenzlawz ndaej duznon de dauq.

Doengh duz moed mbouj doxgyau de caemh angqvauvau, lumj diuqfoux daeuj ciep bang moed iq de nei.

(faenzcieng ndei gwnz muengx Veiz Munglingz/hoiz)