Gou doeg gvaq haujlai saw gangj gij gojgaeq boux yinghyungz haenx, hix roxyiuj haujlai saeh yinghyungz gamjdoengh vunz, hoeng gou geiqndaej ceiq maenh dwg 《Bing Iq Cangh Gaj》 bonj saw neix lo. Daegbieg dwg deng bouxcawj ndaw saw—— Cangh Gaj cungj cingsaenz gyaezguek caeuq dai cungj mbouj lau haenx gamjdoengh liuxliux.

Bonj saw gangj aen gojgaeq dwg yienghneix: Youq ndaw aen mbanj heuhguh Fangzmboujlingz, miz buzgeq singq Cangh ndeu, de vih baujhoh ndaw mbanj boux Bazluginh ndeu, deng bingfangz Yizbwnj gaj dai. Daeglan buzgeq Cangh Gaj daj iq couh mbouj miz bohmeh, buz lan song boux doxbaengh doxing gvaq saedceij. Buz de deng gaj le, Cangh Gaj bienqbaenz lwggyax lo, de rox- nyinh bang bingfangz Yizbwnj dwgcaengz yaek dai, couh gag mieng aeu vih buz de bauqcaeuz. Youq bak mbanj Mohyinzdu, Cangh Gaj ngamq bungzdaengz boux cinhcazyenz Loz Ginhbauj, boux au Loz neix couh dazyinx Cangh Gaj bae caeuq Cenz duicangj doxraen, yienghneix de couh youq budui ndaej guh boux cinhcazyenz iq lo, de riengz budui bae daengz haujlai deihfueng hoenx ciengq caegguk hoenx haenx, daengzlaeng Cangh Gaj baengh Bazluginh caeuq gij saenqsim bonjfaenh, gaj le gij bingcaeg bang Yizbwnj haih dai buz de haenx, bauqcaeuz lo, youh ginggvaq baihgwnz baecinj le, ndaej fag cungq boghog ndeu, de sikhaek baenz boux yinghyungz iq ndaw mbanj lo.

Doeg gvaq 《Bing Iq Cangh Gaj》 le, hawj gou rox haujlai. Gou daj ndawde rox aeu hag gij cingsaenz bing iq Cangh Gaj, daihdamj bae wngqdoiq saeh daengxcungq, mboujlwnh bungz- daengz gijmaz hojnanz, cungj mbouj ngaemgyaeuj fug saw. Ngoenzlaeng youq hagsib、swngh- hoz ndawde, gou gizgiz cungj aeu Cangh Gaj guh buengjyiengh，hag de daihdamj caeuq miz dungxcaiz, guh bouxvunz doiq sevei miz gungyen ndeu.

(Bwzduh/raiz Yinj Fuzgen/hoiz)