Miz bonj saw ndeu, de mbouj miz saek cih saw, cix dauqcawq cungj dwg yozvwn, gwnz saw mbouj miz mingz bouxraiz, hoeng moix boux vunz cungj dwg bouxraiz bonjsaw de, aen mingz bonj saw neix heuh 《Ndwenngoenz》, ndwenngoenz daez- singj raeuz haujlai haujlai.

“Swhmungz, gou ok 10 mwngz aeu mbouj aeu.” Gij sing coi vunz baez gangj okdaeuj, caezgya cungj yawj coh gou. Neix dwg gij cingzgingj aen singhgiz satbyai ndeu, gou caeuq geij boux baengzyoux guhdoih dwkbej.

“Gou aeu, caj yaep gonq, gou yawj ok mbaw bej lawz.” Gou doq ngaek gyaeuj doq youq fwngz bej luenhlablab gou ra bej.

“Vaiq di, cungj hawj dou caj mwngz ok bej, mwngz mbouj naengz moix baez cingjleix ndei bej ha……” Gizgiz mbouj naihfanz naeuz. Gou yawj baj bej ndei gwnz fwngz swhgeij, daekeiq dwk han coenz ndeu: “Caj gou yaep ndeu baenzlawz la, mwngz yawj nw, gou mbouj cingjleix bej hix hingz ndaej sou.” Dahraix, mbat neix gou youh hingz lo, gou angq dwk bekfwngz, riuhaha hwnjdaeuj. Daxmeh naengh youq henz gou, saeknaj mbouj aiq ndei dwk daengx gou da ndeu gangj: “Mbouj cingjleix bej, daengzdaej dwg hingz mbouj liux, mwngz mbat neix baengh caijsoq ndaej hingz lo, mwngz mbouj hojnaengz baezbaez cungj miz caijsoq yienghneix ndei!” Gou cix mbouj haeujrwz riuhihi naeuz: “Haenx couh caj yawj.”

Lingh lwnz youh hainduj lo, Gizgiz ok mbaw 11 ndeu, ha, gou cingqngamj miz mbaw 13 ndeu, gou swnh fwngz couh ndek okbae lo, ndawsim gou gag angq, seiz gou cingq sim’angq, gou baez nu bej, cij yawjraen lijmiz song mbaw 13 yo youq gyang bej gou.

“Mbaw 13 neix gou mbouj ok lo.” Gangj dwk gou couh iet fwngz yaek aeu mbaw 13 haxbaenh ngamq ok haenx dauq. Caemhseiz, fwngz daxmeh caeuq baengz- youx doengzseiz bek roengzdaeuj hemq naeuz: “Mbouj ndaej! Bej gaenq ok le couh mbouj ndaej caiq dawz dauqbae lo!” Gou simgip dwk singhung euq gangj: “Gou ok loek lo! Gou lij caengz yawj raen gwnz fwngz gou lij miz 13!” “Haenx ienq byawz, cijndaej ienq bonjfaenh mbouj cingjleix bej!” Daxmeh mizdi hozhwnj gangjnaeuz. Gou lumj bizgiuz laeuhheiq nei, naiqnuek naengh youq gwnz sahfaz ienqhoij dwk cig bek gyaeuj, sim siengj: Ae, cungjdwg aenvih gou mbouj cingjleix bej cij yienghneix ok loek, danghnaeuz gou mbouj ok mbaw 13 haenx, gou couh ndaej dawz sam mbaw 13 cuj baenz “cadan”, yienghneix lienz bej gwnz fwngz gou couh swnhleih ok okbae lo.

Ginggvaq baez gyauyin neix, baez dwk buenz bej ndeu gou cungj cingjleix ndei bej, ciemhciemh gou roxnyinh yienghneix guh, ok bej ndaej engq vaiq, lohnaemj engqgya cingcuj, caemhcaiq gij bej yawj- daeuj mbouj ndei haenx, ginggvaq cingjleix caeuq cujhab, hix ndaej hingz, caemhseiz hix hawj gou roxnyinh daengz dwkbej dwg cungj doengh’uk guhcaemz mizyinx ndeu.

Dwkbej yienznaeuz dwg ndaw ndwen- ngoenz cungj guhcaemz iq ndeu, hoeng de cix daezsingj gou: Ndaw ndwenngoenz mboujlwnh dwg guhcaemz, roxnaeuz dwg hagsib, cungj aeu hag rox doq guh doq faen loih cingjleix, caemhseiz ceiqrox cingjhab, yienghneix guh saeh lohnaemj hix engqgya cingcuj, engqgya miz diuzleix, engqgya mizyauq.

(Gyanghsuh Suhcouh Gohgicwngz Vaigozyij Yozyau Sau Yizsungh/raiz Nungz Cinfung/hoiz)