Miz ngoenz ndeu, daxboh daxmeh doxcaez ok cienz cawx boux vunzgihgi ndeu hawj gou.

Gou aeu vunzgihgi guh boux baengzyoux ndei gou. Vunzgihgi ndang hausagsag, lumj miz haujlai bwnhau, lwgda hunghwd, gen dinjdet, ga hix dinjdet. Gou cuengq vunzgihgi youq henz mbonq gou, vunzgihgi ngoenznaengz dawzseiz heuh gou hwnq、cat heuj、gwn haeuxhaet、raiz cozyez caeuq guh gij saeh wnq.

Miz ngoenz ndeu, daxboh ciep dienhvah gunghswh dwk daeuj le, caeuq gou nem vunzgihgi naeuz:“Gou yaek bae gunghswh mbat ndeu, daengz banhaemh caet diemj cij dauq ranz, mwngz caeuq vunzgihgi aeu dingq gangj bw!”

Gou naeuz:“Ndei, daxboh, gou caeuq vunzgihgi cungj dingq gangj.”

Daxboh ngaekngaek gyaeuj ok- dou lo.

Gou caeuq vunzgihgi cingq guhcaemz yinx, sawqmwh dingqnyi miz vunz roq dou, gou lau lai, caeuq vunzgihgi naeuz:“Vunzgihgi, gou lau raixcaix.”

Vunzgihgi naeuz:“Gaej lau, bouxcawj, gou baujhoh mwngz.”

Gou ngaekngaek gyaeuj, gvaq yaep ndeu, vunz rog dou youh roq dou lo, gou youh caeuq vunzgihgi naeuz：“Vunzgihgi, de youh roq dou lo, daxboh mbouj dwg banhaemh caet diemj cij dauqma lwi?”

Vunzgihgi naeuz:“Dwg ha, boux- cawj, daxboh naeuz banhaemh caet diemj cij dauqma, geizgvaiq lai lo, dwg byawz ne？”

Gou cam:“Vunzgihgi, dwg mbouj dwg boux mbouj roxnaj ne？”

Vunzgihgi hix dwglau raixcaix, yienghneix dou couh buet bae cam daxmeh, daxmeh naeuz:“Mbouj goj- naengz, banringz miz byawz roq dou？”

Gou caeuq daxmeh naeuz：“Daxmeh, dwg boux mbouj roxnaj ne, daxboh naeuz de banhaemh caet diemj cij dauqma.”

Yienghneix, gou caeuq vunzgihgi bae henz dou cam:“Mwngz dwg byawz?”

Vunz rog dou naeuz:“Fanjcingq gou mbouj dwg vunzrwix, gyoengqsou hai dou couh ndaej lo.”

Seizneix, vunzgihgi caeuq gou naeuz:“Mbouj baenz, bouxcawj bae ra daxmeh bauqgingj, gaej dingq sing- yaem lumj daxboh, raeuz bungz vunzrwix lo.”

Gou guhmuengz buet bae rug daxmeh, aeu soujgih dwk dienhvah hawj gingjcaz, gvaq haujlai nanz, gingjcaz caengz daeuj daengz, gou bae cam daxmeh, daxmeh hix mbouj rox. Youh gvaq yaep ndeu, gingjcaz daeuj lo, gaem vunzrwix bae lo.

Gou naeuz:“Vunzgihgi, gou gyaez mwngz raixcaix, aenvih mwngz coeng- mingz, youh hozndei, gyo’mbaiq mwngz baujhoh gou.”

Vunzgihgi naeuz:“Bouxcawj, mbouj miz maz, cijaeu mwngz caeuq daxboh daxmeh ndaej bingzbingz an- an couh baenz.”

Seizneix, daxboh dauqma lo, gou gotumj daxboh, caeuq de naeuz：“Daxboh, gyo’mbaiq mwngz caeuq daxmeh doxcaez okcienz cawx boux vunzgihgi neix hawj gou, de coeng- mingz raixcaix, youh hozndei, lij rox baujhoh vunz, gou caen gyaez de raix- caix.”

Daxboh naeuz:“Lwg ha, gizsaed vunzgihgi hix mbouj bengz, mwngz gyaez couh baenz.”

(Leiz Siuhveij)