Ngoenzgyaj gvaq cieng, ndwen- ngoenz dou gizgiz feih cieng noengznwdnwd.

Feih cieng yo youq ndaw ngaiz haemhndaep haeux byaek lai cungj lai yiengh de.

Baez daengz seiz gwn ngaiz haemh- ndaep, henz congz couh naengh rim lwgnyez, bouxboux yawj coh byaek gwnz congz：Byacien、gaeqdumq、bitdumq、nohgaeuq、byaekheu cawj caeuq guj dangq haeuxyangz ndoksej ndatfwdfwd hoenz- ngeungeu ndeu dem, gak cungj gak yiengh、lohloh miz caez, homfwd hawj vunz myaiz rih. Caeuq vunz ndaw ranz doxcaez, angqyangz gwn gij haeux byaek ndeigwn ngamjbak, roxnyinh vuenyungz raixcaix. Neix couhdwg feih cieng ndaw ngaiz haemhndaep, ndeigwn ngamjbak, feihdauh dangqmaz.

Feih cieng yo youq ndaw raeblaeng gyoengqvunz nyaengqnyatnyat.

Gyoengq vunzhung nyaengq cawx huq gvaq cieng, nyaengq nem doiqcieng, nyaengq oet hoengzbau, lij nyaengq baet ranz. Gyoengq lwgnyez cix nyaengq lingx hoengzbau, nyaengq yawj foux saeceij, nyaengq daenj buhmoq caeuq cuengq bauq. Gyoengqde bouxboux gaem geij hab bauq, fwngz gaem diuz yieng, geij boux guhdoih doxcaez, bae dieg mbouj miz vunz, cuengq bauqhabfeiz, yienzhaeuh buet gyae liz haj roek mij, cienq ndang riuhehe caj bauqhabfeiz yiengj, caj yiengj sat, youh buet dauq bae yawj……Youq ndaw feih hanh caeuq feih ywbauq, dwg mbouj dwg hix miz di feih cieng?

Feih cieng yo youq gwnz najriu gyoengqvunz.

Najriu mwh lwg okrog dauqranz, najriu mwh lwgnyez guhcaemz, najriu mwh vunzhung gangjgoj……Cungj miz cingz- gamj naekgwd, baenz gij feih cieng vut mbouj bae.

Feih cieng mboujdan dwg gwn gijgwn feih, engq miz cungj cingsaenz dem. Miz cungj maqmuengh gvaq ngoenz, miz lwgda yawjraen vuenyungz, gvaq cieng cij engq miz “feih”.

(Vangz Vanjcingz)