Ngoenz ndeu banhaemh, gou caeuq daxboh caez bae rogdoengh. Youq ndaw cazrum henz dieg haeuxyangz, daxboh yawjraen duz ruemh ndeu. Gou swnh gij ronghdaeng muengh bae, cij yawjraen baenz benq baenz benq rum heusausau. Ye, duzruemh youq gyawz ne?

Soujden ronghsagsag ciuq youq gwnz mbaw rum gaebraez ndeu, gou baez dinghyawj, gawqyienz youq gwnz mbawrum yawjraen duzruemh lo , yienzlaiz de youq gizneix! Aen gyaeuj de soemsetset, lumj diuzoen govengjhoengz, youh lumj doenlwenj. Dingj gyaeuj de miz song geu mumh, lumj rumroz nei. De caen dwg boux gyajcang sughangz ndeu!

Dou gaemhdawz duzruemh gyaeuj soem neix, gyaeng de youq habduznon. Gou depgyawj sijsaeq baez cazyawj, fatyienh de miz roek cik ga, ga laeng daegbied saeqraez. De youq ndaw habduznon gikgyat, lumjdwg mbouj miz saekdi simgeiq mbin deuz.

Ngoenz daihngeih banhaet, gou yawjraen de duet le gienh buh loq ronghcingx ndeu, gienh buh neix baihlaeng miz diuz geh ndeu, lumj diuz vunz gou baihlaeng cang miz diuz raglienh nei. Duzruemh duet buh le ndangdaej bienq hung lo, hix bienq heu lo, hoeng de ciuqgaeuq naiqnueknuek.

Gou caeuq daxboh itheij ra rum’oiq daeuj, cuengq youq ndaw habduznon, duzruemh gyaeuj soem cix mbouj yinx gij rum neix, ciuqgaeuq mbouj miz cingsaenz. Yienghneix, dou cuengq de dauqma ndaw cazrum, maqmuengh de youq ndaw daswyenz maj ndaej ndangcangq vaiqvued.

(bouxraiz: Se Ciuhyen Bouxhoiz: Nungz Cinfung)