Gveigangj Si Cinzdangz Gih Mungzgungh Cin Gujsanh Siujyoz haj (1) ban Veiz Caijvwnz

贵港市覃塘区蒙公镇古山小学五(1)班 韦采文

2043 nienz 10 nyied 30 hauh, Baekging seizgan 7 diemj cingq, wnggai hwnqcongz lo! Gij sing denswj soujbyauj youq henz rwz gou yiengj hwnjdaeuj, hawj gou daj ndaw fangzhwnzloq doeksaet singj gvaqdaeuj, ndigah gou daeuj daengz 20 bi gvaqlaeng.

“Ijij——ijij——”Lijcaengz caj gou cingsaenz gvaekgvaek, couh dingqnyi rog cueng yiengj raq sing he. Rag hai gij yiemzcueng, gou doeksaet, neix lij dwg aen mbanjranz gou roxnaj de lwi? Doenghbaez cix miz gij ranz sangngau, seizneix rog cueng gingqyienz dwg benq raemhfaex mwnswdswd ndeu. Naemj daeuj, gij sing gou dingqnyi haenx couh dwg ok ndaw neix daeuj ba? Baez mup, lij miz cungj feihdauh namhdumz caeuq vahom dem. Caiq ngiengx ngaeuj yawjyawj gwnz mbwn, mokfaenx mbouj raen lo, loh’ok daengngoenz hoengzhwdhwd, ciuq youq gwnz ndang raeujrubrub. Vanzging caen ndei!

“Hwnjban seizgan daengz!” Aen den- swj soujbyauj daezsingj gou, gou naengh hwnj ci bae hwnjban. Gwnz loh gou mbouj duenh ngeixnaemj, ngeihcib bi gvaq le gou dwg guh gijmaz hong ne? Dauqdaej daengz dieg, gou sim’angq lo. Gij hagdangz dangqnaj gingq- yienz dwg aen hagdangz gou sug haenx! Yienzlaiz dwg aen hagdangz gou sug haenx! Laxlawz, 20 bi gvaqlaeng, gou baenz boux lauxsae ndeu. Byaij haeuj gyausiz, doenghbaez gij daiz byoengq haenx cungj bienq ndaej moqsaksak, hwzbanj caeuq faenjbit cix mbouj raen miz lo. Mwh gou geizheih baenzlawz hwnjdaengz, cienzsik daeuzingj couh okdaeuj lo, yienzlaiz raeuz baenzneix hwnjdangz. Youq gwnz dangz, gou caeuq duzbya beij youzraemx, ndonj gvaq aen bak duz byasahyiz, caeuq canghdwkbya gaemfwngz…… Mizyinx raixcaix.

“Roengzban seizgan daengz! Bonjfaenh yaek vih mwngz yawhdingh doxgaiqgwn.” Seizneix denswj soujbyauj yiengj hwnjdaeuj, caemhcaiq anbaiz ci hawj gou ndei lo. Aen soujbyauj youh yiengj hwnjdaeuj lo:“Gaenq vih mwngz diemj haeuxgwn.” Gou diemj hai baez yawj, cungj dwg gij gou gyaez gwn haenx, baez gwn haeux gingqyienz mbouj lumj gaxgonq yienghhaenx luenhgyuk, cix dwg baenz daiz baenz daiz vunzgihgi guhhong, vunzgihgi miz laex sadsad yinx vunz haeuj daiz, yaep ndeu gij gwn couh baij gwnz daiz rim lo. Nip byaek baez cimz, ndeigwn dangq- maz, gou naemj ngoenzngoenz ndaej baenzneix gwn couh ndei lo!

“Dingling——dingling”, nauhlingz youq henz rwz gou yiengj lo, hawj gou daj ndaw fangzhwnzloq doeksaet singj gvaqdaeuj, yienzlaiz gij gyaeundei haenx cungj dwg fangzhwnzloq. Hoeng gou doiq daengzcog maqmuengh rimcuk, saenq mbanjranz gou gvaq 20 bi le, vanzging itdingh engq ndei, gunghcoz itdingh engqgya fuengbienh, gyoengqvunz gwndaenj itdingh engqgya vuenyungz.

(指导老师：邓界)