Gveigangj Si Cinzdangz Gih Mungzgungh Cin Gujsanh Siujyoz roek nienzgaep Veiz Cwzvaz

贵港市覃塘区蒙公镇古山小学六年级 韦泽华

Seizgan gvaq caen vaiq ha! Baez yaepda gou gaenq haeuj roek nienzgaep lo, youq ndaw roek bi neix, gou hag gvaq haujlai monz gunghgo， miz Sawgun、suenqsoq、Yinghyij，lijmiz gohyoz……Gou ceiq mbouj gyaez hag dwg monz Sawcuengh.

Geiqndaej mwh ngamq haeuj youwzyenz, moix ngoenz lauxsae cungj dwg fanfan fukfuk son dou doeg sij gij singmeh yinhmeh singdiuh Sawcuengh, gou gig lau sij gij cih ngutngut ngeujngeuj lumj saejgaeq haenx. Cigdaengz haeuj siujyoz seiq nienzgaep, gou cij cengqgengz ndaej yungh Vahcuengh doeg saek bien faenzcieng roxnaeuz saek bien gojgaeq.

Youq ndaw hagdangz ranzdoegsaw dou, miz haujlai sawfwen、 saw gojgaeq、 bauqceij caeuq cazci daengj, mwh ndaejhoengq gou cungj bae fanfan yawjyawj. Miz baez ndeu, gou youq gwnz 《Gvangjsih Minzcuz Bau》 yawjraen bien faenzcieng ndeu, bien neix dwg boux lauxbanj ciengxgaeq ndeu gaisau fuengfap ciengxgaeq, daegbied gangj daengz duzgaeq fatbingh le baenzlawz yw, yungh gij yw lawz. Gou geiq gij fueng’yw de haeujsim, aenvih daxmeh gou moix bi cungj ciengx haujlai gaeq, gaeq gingciengz fatbingh, mizseiz roengzyw mbouj deng dai le haujlai, meh gou sim’in baenz geij ngoenz, gwn ninz cungj mbouj onj, gou naemj gij fueng’yw neix danghnaeuz naengz bang daxmeh gou geijlai ndei ha! Doeklaeng gou dawz aen fueng’yw yw gaeq baenzbingh lwnh hawj daxmeh nyi, dexmeh gou buenqsaenq buenqngeiz, doeklaeng ciuq aen fueng’yw bae guh dahraix, gaeq caen bingh siuj lo, hix mbouj raen fatraq gvaq. Dayawj gaeqbueng maj ndaej hoengh, daxmeh riu lo, gou hix riu lo.

Daj ngoenzhaenx hwnj, gou liz mbouj liux Sawcuengh, gou aeu hag Sawcuengh.

(指导老师：韦宏庆)