Gveigangj Si Cinzdangz Gih Mungzgungh Cin Liuyui Siujyoz roek (1) ban Veiz Yenginz

贵港市覃塘区蒙公镇廖瑞小学六（1）班 韦燕群

Youq aen banringz nditndat ronghsag ndeu, lauxsae dijyuz baez boq sauq, gyoengq doengzhag couh roengz laeuz bae lo, de fat sing minghlingh ndeu, gyoengq doengzhag roek nienzgaep caeuq haj nienzgaep couh ndwn youq gwnz cauhcangz lo. Seizde ndaw gyoengq doengzhag lumj cij dingqnyi gij sing diemheiq, yienghceij miz di gaenjcieng.

Lauxsae dijyuz raen daihgya mbouj gangj vah lo, de couh gangj: “Ngoenzneix raeuz haj roek nienzgaep lwgsai guh mbat doxdax bengcag ndeu.” Gyoengq lwgsai baez dingq, sikhaek couh miz cingsaenz lo, gwnz naj gyoengqde cungj loh ok cungj yiengh ndaej hingz haenx. Ban raeuz boux ceiq cangq haenx heuh guh Dazcwngz, de nu da yawj doengzhag haj nienzgaep mbat ndeu, riuriu, couh hainduj guh yindung raeujndang lo.

“Sam, ngeih, it.” Lauxsae dijyuz sing baez sat, daihgya couh haenqrengz bengcag lo. Ban raeuz gij lwgsai daeg beij daeg miz rengz, gyoengqde miz mbangj maeuq roengzdaeuj, ndang nyeng gvaq mbiengj bae, yienznaeuz yienghceij mbouj ndeiyawj, hoeng cix lumj gij yiengh cansw cunghfungh baenaj yienghhaenx buekmingh. Haj nienzgaep doengzhag hix mbouj nyinh saw, cungj sawjok gij rengz gwncij daeuj, daegdaeg cungj dwg naj nding rwz hoengz, daengx lwgda, couh lumj duz gukak raen daengz gij gwn swhgeij eiq gwn nei. Da raen diuzcag cungqgyang diuz saihoengz haenx couh yaek biu gvaq mbiengj doiqfueng bae lo, lahlahdui hix okdaeuj lo, lahlahdui duicangj daiq gyoengq doengzhag mbwk ban raeuz vih doengzhag sai ban raeuz gyayouz haeujheiq. “Gyayouz! Gyayouz! Rag de roengzbae!” Ban raeuz gyoengq lwgsai dingqnyi le daegdaeg cungj haenqrengz bengcag, lumjbaenz gukak nei hemq dwk, ban raeuz Dazcwngz doengzhag baez daemxdin, ndang lak gvaq baihlaeng, diuz saihoengz gwnz cag haenx youh dauq biu gvaqma. Youq henz gij vunz bouxboux cungj ngaengh liux bae. Raq sing hemq gvaq le, doengzhag haj nienzgaep haeb faenz haeb heuj, hoeng diuz saihoengz haenx deng beng bibi buengqbuengq, yaep deng beng bae yaep deng beng dauq, gyoengq dahsau lahlahdui hemq daengz hozdek, hix faen mbouj ok saw hingz daeuj. Dazcwngz youh haenqrengz baez beng, mbat neix “sausien ndaejhingz” hix daeuj ra raeuz lo. “Va, raeuz roek nienzgaep hingz lo”, doxdax bengcag daengz neix couh sat lo.

Daihgya gag byaij deuz, mizmbangj lij baeg- ngabngab, mizmbangj naj nding rwz hoengz, lij mizmbangj baeg ndaej gyad naengh gwnz namh, fueng haj nienzgaep haenx lij mbouj lumz gag nai naeuz:“Ban dou cix dwg caengz fatvi ndei, baez- laeng raeuz itdingh ndaejhingz.” Ban raeuz gij lwgsai cix naeuz:“Hingz mbouj ndiengq, saw mbouj daej, cix ndaej guh boux cienghginh ciengz hingz.”

Mbat doxdax bengcag neix hawj gou roxnyinh daengz, fanz saeh aeu genhciz roengzbae, doengzsim haenqrengz couh ndaej hoenx hingz gunnanz.

（指导老师：董华英 覃洪球）