Goeng gou caetcib lai bi, bwn’gyaeuj hausaksak, naj bizlotlot, dawz fouq gingqda lauxva ndeu. Ndang goeng gig giengq, moix ngoenz guh hong、gwn laeuj、dingq heiq、youzlangh, yiengh ndeu cungj mbouj lauq. Daegdiemj ceiq laux goeng couh dwg daegbied maij baiqlaeujninz.

Miz baez ndeu ngoenzciet, dou daengx ranz dauq lajmbanj caeuq goeng buz gvaqciet. Goeng riuhaha ciepcoux dou haeuj ranz, doiq gou riunyumnyum naeuz:“Lan gvai, raeuz caemhdoih yawj densi ba!” Gou simhai dapwngq. Hoeng mwh gou cingq yawj ndaej naemq, rwz gou dingqnyi sing gyaenfofo. Gou baez yawj, yienzlaiz, goeng gaenq ing youq sahfaz ninz ndaek lo. Sing gyaen goeng yied daeuj yied laux, sing dam sing, sing hwnj sing roengz, cungj yaek hung gvaq sing densi lo. Goeng caen dwg duz “non- laeujninz” ndeu ha!

Moix baez okdou youz, baez hwnj ci, sing gyaen goeng haengj- dingh daengz, gij yinhyoz sing gyaen goeng bouxdog gag ciengq haenx cungj rox buenx dou daengx roen. Goeng maij ninz, hoeng guh hong gig saeqsim. Moix baez dou dauq ranz, de cungjdwg swiq byaek seuq cuengq youq henz, caj dou gietdingh gwn cungj feih lawz cij roengz rek cauj. Bien cauj byaek bien saeqsim cam, dwg cit roxnaeuz dwg hamz, miz gijmaz genyi, yawj goeng baenz nyinhcaen, gou nyaenx mbouj ndaej naeuz:“Goeng, ngoenzneix mwngz baenzlawz mbouj baiqlaeujninz lo?” Goeng riuhaha naeuz:“Vih gyoengq bakngah sou guh gaiq ndeigwn, guhlawz ndaej baiqlaeujninz ne!” Hoeng, cauj byaek liux, goeng naeuz yietnaiq cit amq ien ndeu, gumq ngamq nem sahfaz, ien lij diemj mbouj ndaej, couh ngeng gyaeuj gyaenfofo lo.

Goeng “nonlaeujninz” gou dwg mbouj dwg gig mizyinx? Gou gig maij de ne!

(Cinz Gohdungz/sij Lij Yanghlenz/hoiz)