Mbatmbat siengjdauq haet de, gou cungj ienqhoij raixcaix.

Ngoenzngoenz gou bae hagdangz cungj dwg yahdaiq gou cawj ngaiz- romh ndei le heuh gou hwnqdaeuj, caj gou gwn liux caiq soengq gou bae hagdangz. Doenghbaez gou itcig ngeixnaeuz yahdaiq mboujmiz gijmaz saeh you, hoeng gienh saeh haenx hawj gij yawjfap gou bienq lo.

Haet de, yahdaiq cawj ngaizromh ndaej le cix heuh gou hwnqdaeuj gwn. Gou aeu cib faencung cooh vuenh buh cat heuj swiq naj sat, roengz laj laeuz bae gwn seiz, ngaizromh cungj caep liux lo. Gou cimz gaemz ndeu, lij miz di cit dem. Naj gou doq raezrangrang, yahdaiq raen le doq cam gou:“Mij feih ma?” De hauhneix cam gou, gou engqgya naeuq, doq fatheiq dwk de: “Hoj gwn yaek dai! Cungj caep liux lo! Lij cit dangqmaz!” “Haenx gou caiq dawz bae roengz rek ndat hawj mwngz, gya di gyu dem, ndaej lwi?” Yahdaiq cam gou. Gou hozhuj hemq naeuz: “Gou mbouj gwn lo!”

Gaenlaeng yahdaiq ma ndaw rug bonjfaenh, haep dou hwnjdaeuj. Lw gou gag boux ndeu ndwn youq haenx, gou youq haenx sien dwg caegriu, ndaenggon dangqmaz, hoeng gou caengz daekeiq geijlai nanz, gou cix rox naeuz bonjfaenh loek lo, lumj gou yienghneix, luenh fatheiq dwk vunz- laux, gvaqlaeng le cungj bietdingh ienqhoij.

Yawjraen gij byaek caeuq haeux gwnz daiz de, gou caiq dauqsiengj daengz mbat gonq gou cawj byaek seiz deng youz sinz baenz ndang cixbah, byaek lij nem rek lo. Banneix ngvanh daeuj, yahdaiq gou cawj byaek geijlai dwgrengz, yaek rih geijlai hanh cij ndaej cawj baenz, hoeng de daeuj Suhcouh ciuqgoq dou sam bi lai, cungj mbouj miz saek coenz vah’ienq, gijmaz hong cungj guh, mbouj gouz ndaej gijmaz hoizbauq.

Gou menhmenh nyoengx hai aen dou rug yahdaiq, doiq de naeuz: “Yahdaiq, gou loek lo, haxbaenh gou mbouj wnggai fatheiq dwk mwngz, Mwngz ndaej yienzliengh gou lwi?” Yahdaiq doiq gou cungj dwg yienghde doenghoz:“Mbouj miz maz law, mwngz gamj nyinhloek, couh dwg majhung roxsoq lo.”

Gou ciengxlwenx mbouj rox lumz haet de, gou daj bande hainduj menhmenh roxsoq.

(Cuih Hanzyui/sij Veiz Munglingz/hoiz)