“Yo, yo, va! Mbwn ha! Duz max neix buet ndaej vaiq lai loba!” Gou nyaenx mbouj ndaej hemq hwnjdaeuj. Aen gyajgiz seizhwngq, dou daengx ranz vunz bae Nei- mungzguj youz, youq gwnz diegnywj gvangqyauyau, gou gwih duz max henj ndeu, gaenriengz duz max myox(henjgeq) ndeu cwxcaih dwk buetbongh.

Din gou caij youq gwnz gaiq daebgiek diet, gou caenhliengh caij mbaeu di, mbouj hawj max naet lai. Fwngz gou cix maenhmwt gaem- dawz aengien naeng ndeu. Ndang- daej gou riengzdwk ndangmax riengjvaiq daenh bae daenh dauq, ndaw dungx fanboek fofo, couh lumj youq gwnz roen iq lajmbanj gwih gaq danci laeuh heiq nei. Rieng duzmax dauqdwg gaen- riengz ndangmax saenqdaenh bibi buengqbuengq, soengsetset.

Youq gwnz max yawj ndaej gyae, sawj gou ndaej engq ndei bae gamjsouh gij gyaeundei caeuq hunggvangq diegnywj. Diegnywj laj din mbinfafa doiq dauq baihlaeng, rumz ci ndaej byoemgyaeuj gou ndiengq hwnjdaeuj, yoekyiem raix- caix.

Gwih lozdoz caeuq gwih max mbouj doxdoengz, gwih max aeu anmax, hoeng gwih lozdoz cij aeu bu fan damj ndeu, youq cungqgyang song aen doengq lozdoz baez naengh couh baenz. Bouxcawj nungzcangz yien duz lozdoz ndeu daeuj, riengzlaeng baez fwt rag cag, caiq hat sing hung ndeu, lozdoz couh swnhfug bomq roengzbae lo. De ndangdaej hung lai, seiz bomq roengzbae lumj faq ciengz henj- namh ndeu, hawj vunz roxnyinh gig ancienz. Gou hamj hwnjbae le, bouxcawj nungzcangz bekbek gyaeuj lozdoz，fat lingh, lozdoz galaeng baez yungh rengz, ndwn hwnjdaeuj lo. Gou ganjgip vaxdawz doengqhwet lozdoz saenzded de, cij mbouj banj roengzbae.

Lozdoz hung sang lai, youq gwnz lozdoz beij youq gwnz max yawj ndaej gyae, hoeng byaij hix haemq menh. Miz seiz lumj youzbyaij nei ngamq yamq ndaej saek song yamq, couh ngaem diuz hoz raezrangrang de roengz, hainduj cwxcaih dwk gwn nywj, moix baez daxboh cungj haenqrengz beng cag, de cij mbouj cingznyienh dwk yamq yamq iq ndeu.

Gwih lozdoz caeuq gwih max, yienznaeuz duz ndeu dwg buetfafa, duz ndeu dwg byaijyaebyaeb, hoeng youq ndaw sim gou, cix caemh- yiengh roxnyinh sangj raixcaix.

(Sau Yizsungh/raiz

Nungz Cinfung/hoiz)