Ndaw ndwenngoenz miz gojgaeq gak cungj gak yiengh, mizyinx dangq- maz.

Ngoenzsinghgiz gvaqringz, gou fatyienh duz roeglaej ndeu mbin haeuj congh ciengz rog ranz gou. Doeklaeng, youh miz duz roeglaej ndeu mbin haeuj bae lo. Gou gig geizgvaiq!

Gyanghaemh, gou ngamq yaek guh fangzhwnz. “Cijcet、cijcet” sawq- mwh deng geij sing roegheuh heuh singj lo. Daxmeh rox le daeuj cazyawj, cijraen de fwngz gaem dienhdoengz hai cueng, iet gyaeuj okbae ra, ra raen song duz roeglaej dahraix. Haet daihngeih, daxmeh dawz ndaek faiq lumj aen vangjgiuz hung haenx, bin hwnj aen lae aeu ndaek faiq oet bak congh. Duz roeglaej iq youq ndaw congh heuh ndaej siliengz vetvet. Song duz roeglaej geq dingqnyi sing heuh, fatyienh daxmeh gou, haenqrengz mbin gvaqdaeuj, youq baihnaj daxmeh gou mbin bae mbin dauq, lij doiq daxmeh gou heuh geij sing, daxmeh mbouj leixlangh cix baebwq. Gou daeuq gvaq cueng bohliz ronghcingx yawjraen song duz roeglaej geq mbin daengz henz congh, sawq aeu bak beng ndaek faiq ok, hoeng mbouj doh rengz, saedcaih dwg miz sim mbouj miz rengz.

Gyoengqde hojlienz baenzmaz, yawj gyoengqde yienghhaenx mbouj miz banhfap, gou sim siengj: Dangh- naeuz gyoengqde rox gangj lumj raeuz, seizneix dwg naeuz gijmaz ne?

Gou heuh daxmeh aeu ndaek faiq ok. Daxmeh hix rox gou siengj guh gijmaz, aeu ndaek faiq ok le, gyoengq roeglaej mbouj nanz hix dingh roengzdaeuj lo. Buenq ndwen gvaq- laeng, gyoengqde maj hung lo, rox youq henz ranz gou lienh mbin, hix rox doiq gou heuh. Youh gvaq le geij ngoenz, gyoengqde rox mbin lo, swyouz lo, mbin daengz diendeih engq gvangqlangh bae lo.

Ndaej caeuq ranz roeglaej neix doxbungz, doxcaeuq youq youh doxbiek, gou roxnyinh miz caijsoq dangqmaz. Gij saeh iq neix rox itcig yo youq ndaw sim gou, lij miz gij singheuh caeuq gij yiengh ajfwed mbin haenx.

(Yez Linzlingz/raiz

Lij Yanghlenz/hoiz)