Daxboh gou byoemgyaeuj ndaemndwt, miz di gienj, gwnz ndaeng gaq fouq nganxciuq ndaem, miz aen bak hung rox gangj rox lwnh ndeu, vunz baez daih’it raen de cungj roxnyinh de dwg boux youh coz youh cingsaenz gvaekgvaek ndeu.

Daxboh gag guh aen gunghcangj ndeu, de ceiq nyaengq lo. Mwh gou hwnj youwzyenz, moix baez guh caenlwg hozdung, bouxwnq cungj miz daxboh daxmeh daeuj buenx, hoeng gou cix mboujcix dwg daxmeh daeuj buenx, mboujcix dwg daxdaiq daeuj buenx. Yawj daengz gyoengq nyez iq wnq caeuq daxboh daxmeh caenmaed guh’angq, gou hozhaenz raixcaix.

Daj doeg it nienzgaep hainduj, gou couh maqmuengh gyajgeiz ndaej lumj lwgnyez wnq caeuq daxboh daxmeh caez baeyouz, hoeng couh dwg aenvih daxboh hong nyaengq lai, moix baez bae lijyouz, cij miz gou caeuq daxmeh doxbuenx bae.

Miz baez ndeu, daxboh sawqmwh doiq gou naeuz: “Geij ngoenz neix gou miz hoengq, raeuz daengx ranz okbae lijyouz ba! ”

Gou yaek saenq mbouj saenq naeuz: “Dwg caen ha? Gaej gangjriu bw.” “Dangyienz dwg caen, ngoenzneix youh mbouj dwg ngoenz cietloengh- vunz!” Daxboh haengjdingh dwk naeuz. Gou dingq le angq dangqmaz, sikhaek saetsaet diuqdiuq bae ra daxmeh, coi de vaiqdi dingh biuq, lau daxboh sawqmwh youh bienq.

Miz coenz vah ndeu baenzlawz gangj, lau gijmaz daeuj gijmaz.

Hwnjdin haemh gonq, gou ciep ndaej dienhvah daxboh, de naeuz:“Lwg ha, mwngz ciengeiz gaej ndatheiq, daxboh caeuq mwngz gangj gienh saeh ndeu. ” Dingq daengz gizneix, gou sikhaek roxnyinh daengz mbouj ndei, daxboh ciep dwk naeuz: “Miz boux hek ndeu daeuj ndaw cangj raeuz ngonzyawj damz yezvu, gou gojnaengz mbouj miz seizgan buenx sou baeyouz lo. Saedcaih doiq mbouj hwnj, baezlaeng gou itdingh caeuq sou caez bae. ”

Dingq le, gou lumj doek roengz ndaw vaengz laeg bae nei, buet haeuj ndaw rug daxmeh bae, daej naeuz: “Daxmeh, daxboh mbatneix youh yaeuh raeuz, mbouj buenx raeuz baeyouz lo! ”

Daxmeh mbouj gangj vah, daj ndaw sieng dawz hingzlij daxboh okdaeuj, danq gaemz heiq ndeu, doiq gou naeuz: “Raeuz aeu lijgaij daxboh. De hix gig deqmuengh baez baeyouz neix. Mwngz cuengqsim, miz daxboh youq laeng yawj ranz, gou rox daiq mwngz guhcaemz gvaqyinx bae. ” Mbouj miz banhfap, gou cijndei dingq bohmeh lo.

Seizneix, gou gaenq menhmenh roxyiuj daxboh vihmaz baenzneix nyaengq lo, de nyaengq guh hong cij vuenh ndaej gij saedceij vuenyungz daengx ranz dou. Gou aeu ndeindei hagsib, daengzcog bang daxboh faenrap, hawj de mbouj yungh baenzlai nyaengq, hawj de hix ndaej bibi baeyouz!

(Ciz Swjangz/raiz Veiz Yennaz/hoiz)