Geij ngoenz gonq，gou youq gwnz bonj saw gohyoz cazci raen aen gohyoz sizyen cibfaen saenzgeiz ndeu——Gaiq Gebfaex “Rox Baenaj”. Raen aen mingzcoh neix，mwngz haengj- dingh baenzneix siengj：Gaiq gebfaex baenz- lawz rox baenaj ne？Gou hix baenzneix siengj， ndigah gou couh guh aen sawqniemh iq ndeu.

Guh aen sawqniemh neix，aeu yungh daengz aen batnaj iq ndeu、bingz sijgezcingh ndeu，dangyienz lij aeu gaiq gebfaex ndeu dem.

Yamq daih’it，gou cuengq raemx roengz aen batnaj iq bae rim，riengzlaeng soh cuengq gaiq gebfaex roengz ndaw raemx bae. Seizneix mwngz couh ndaej raen：Gaiq gebfaex youq ndaw raemx cij rox luenh bi bae bi dauq，mbouj aiq rox bae soh. Seizneix，gou dawz gaiq gebfaex hwnjdaeuj，youq giz byai de daz luep sijgezcingh ndeu，caiq cuengq de roengz raemx bae. Haeujsim yawj，yiengh saeh saenzgeiz he okdaeuj lo：Sijgezcingh lumj “aenbang- nyoengx”baihlaeng hojcen nei，byoq ok “feizmbaw”，menhmenh nyoengx gaiq gebfaex haeuj henz batnaj bae.

Da raen yienghneix， ndaw uk gou ngeizvaeg dangqmaz——Sijgezcingh dwg baengh gijmaz rengz ndaej neb gaiq gebfaex daengz henz batnaj bae ne？Gou daiq aen vwndiz neix caz le swhliu，“o，yienzlaiz dwg yiengh- neix!”Gou nyaenx mbouj ndaej gag naeuz gag gangj.

Sou siengj mbouj siengj rox vihmaz baenzneix ne？Yienzlaiz，sijgezcingh ndaej gaijbienq gij rengz najraemx，yienghneix gij raemx haenx couh ndaej nyoengx gaiq gebfaex haeuj henz aen batnaj. Neix hix dwg vihmaz vunzlai ngoenznaengz ndaej yungh sijgezcingh swiq uqyouz.

Guh gohyoz sizyen iq caen mizyinx ha！

（Cuh Yijgoj/raiz

Lij Lungzfangh/hoiz）