Moix baez gou raen doengzhag ndaw ban ndaengmoj ngaungau naeuz de dik ndaej aen giuz ndeu haeuj dougiuz seiz, ndawsim gou cungj hozhaenz raixcaix; mwh gou yawjraen gyoengqde ndaej lienzdaemh gving aen giuz cib lai mbat cungj mbouj doek, gou youh daj hozhaenz bienqbaenz boiqfug. Bande gou couh youq ndawsim mieng naeuz: Gou caemh yaek hag rox dik cuzgiuz.

Muengh le haujlai nanz, suenq muengh maz ndaej maz lo, gou ndaej haeuj aen doih cuzgiuz bae. Ngoenz singhgiz, gou baez daih’it bae ndaw doih lienh giuz, gou guk naengh saihoz, umj aen cuzgiuz ndeu buet gwnz ciengz bae, yawjraen doih dik aen giuz haeuj dou, ndawsim gou ngeix: Baenzneix yungzheih, couh dwg dik din ndeu cix ndaej luma!

Ngvanh ngaih, hoeng guh hwnjdaeuj hoj dangqmaz! Baez daih’it, gou ngamq diem din, siengj dik aen giuz haeuj dougiuz bae seiz, laegfwngh ndwn mbouj maenh, aen giuz dwk gou daemjndoet, doq boemzhoemj roengz namh bae. Gyoengq vunz ndaw doih raen le bouxboux riuhaha, gou youh najnyaenq youh doeknaiq, hoeng gwnz naj gou lumj mbouj miz saeh nei. Mbat daihngeih gou yunghrengz dik din ndeu, dai lo, aen giuz mbinfafa coh goeng gyauqlienh gou. Caeklaiq gyauqlienh ndang riengj, veqdeuz aen giuz lo, langh de deng aen giuz dub dawz ne, gou cungj mbouj rox yaek baenzlawz souciengz. Gou gag gvaiq bonjfaenh, ngvanh naeuz gou dwg mbouj dwg mbouj hab dik cuzgiuz. Gou ngamq siengj naeuz mbouj dik cix sat lo, hoeng bande gou raen miz duz sien iq ndeu mbin gvaqdaeuj naeuz gou:“Gaej gag gvaiq bonjfaenh la, bouxboux cungj miz gij ginglig saetbaih de, cijaeu mwngz ngoenzngoenz cungj haenqrengz bae lienh dik, gou saenq mwngz couh itdingh ndaej baenzgoeng, haenqrengz dwk lienh!” Duz sien de gangj sat cix bienqbaenz haujlai ronghrib mbin deuz lo. Baezneix gou euq heiq, gaenlaeng cigsoh mbat din ndeu, ndaejnyi “bum” sing ndeu, aen giuz daj sienqsoh bienqbaenz sienqgoz, dik haeuj ndaw gokdai dougiuz bae. “Yawj! Gou dik haeuj ndaw dougiuz bae lo!” Gou angq dangqmaz, lumj duzlingz nei youq gwnz giuzcangz saet bae saet dauq!

“Faggiemq raehrwd baengh muz lai, vamoiz hai rang dingj ndaej siet.”Guh gijmaz saeh yaek siengj baenzgoeng cix yaek lai lienh lai hag cooh ndaej, mbouj ngaiz gvaq fwnrumz, baenzlawz ndaej raen duzdoengz?

(Cinz Hauyenh/raiz Veiz Munglingz/hoiz)