Aenmbwn lamzyau dwg diegangq duzroeg, daihhaij gvangqyau dwg diegangq duzbya, aen- daemz sawyau dwg diegangq duzgoep. Diegangq gou cixdwg dah’iq byaimbanj haenx.

Baez muengh bae, dah’iq yiengh luenz- gyaeq, seiqlengq miz faexhung mwncup humx dwk, mboujguenj baenzlawz yawj, gou cungj roxnyinh dah’iq dwg aen cuzgiuzcangz ndeu, seiqlengq gij faex hung caeuq go’nywj haenx couh dwg bouxyawj.

Dah’iq sawdikdik, gwnz raemx miz haujlai go’ngox, foh go’ngox mizmbangj biu dauq baihswix, lumj dwg cingq yawj gingjsaek baihswix, mizmbangj biu dauq baihgvaz, lumj dwg ngamq deng gijmaz hwk nei, “byoemgyaeuj” cungj daengj hwnjdaeuj lo.

Henz dah’iq dwg go’nywj heusausau. Go- nywj manzgyaengq dangqmaz: Mizmbangj cingq caeuq vunz doxhoenx, mizmbangj cingq caeuq vunz doxdax goengrengz, lij mizmbangj bibi nengqnengq. Baihgwnz go’nywj dwg faex hung sohsaeng, gij faex hung neix daengj youq gwnz dieg, lumj boux bing ndwn aen ganghvei de nei. Go’nywj oiqheu, faexhung sohswd, dah’iq lumj cuzgiuzcangz nei, gapbaenz aen diegangq gou maij ndeu.

Moix baez seiznit dauqbae mbanjranz, gou cungj haengj daiq doengzdoih, bae diemqiq cawx song daeh bauqciengj, daeuj daengz dah’iq caq mienhnae. Dou youq gwnz dah dub aen congh iq ndeu gonq, cibfaen maqmuengh gwnz dah ndaej caq baenz yienghlawz bae. Riengzdaeuj boux ndeu diemj bauq, gyoengqdou bouxboux cungj mbaet heiq dwk, gig yousim baezneix caq mbouj caq ndaej mienhnae?

Sawqmwh, bauqciengj deng diemj dawz lo, boux diemj bauq couh riengjret gveng bauq haeuj ndaw congh bae, seizneix gou ganjgip buet hwnj haenz bae, goemq rwz le, gou sing hung hemq sing ndeu: “Vaiq hwnj haenz, yaek caq lo!” Sawqmwh, dingqnyi bauqciengj fatok sing “gululu”, gou siengj: Gou yaek buet gyae di, mboujnex deng nae dwklaemx lo! Cij dingqnyi “bung” sing ndeu, “nae va seiq sinz”! Baenzgoeng lo! Seizneix dou sim’angq dwk doxgot, cienq gien mbouj dingz, naj hai naj riu.

Moix baez dauqma lajmbanj, gou cungj boux daih’it buet bae dah’iq, de hawj gou daiq daeuj vaiqvued, sawj ndwenngoenz gou fungfouq lai yiengh, gou haengj diuz dah’iq neix raixcaix.

(Gauh Ginjsenh/raiz Nungz Cinfung/hoiz)